د بەردەوامیا سەرھلدانا گەلێ رۆژھلاتێ کوردستانێ و ئیرانێ ل دژی رەژیما تەھرانێ دا، ل چەند باژارێن رۆژھلاتێ وەلات جارەکە دن وەلاتیان ب گرتنا دوکان و بازاران دەست ب گرەڤێ کرن.
ئیرۆ رۆژا شەمبیێ 22/10/2022ێ ل سنە، مەریوان، سەقز، بانە، بۆکان و مەھابادێ دوکان و بازار ھاتن گرتن.
چالاکیا گرەڤێ یا ل باژارێن رۆژھلاتێ کوردستانێ پشتی وێ یەکێ ھات، کو چارشەمبا بۆری 19ێ جۆتمەهێ، ناڤەندا ھەڤکاریا پارتیێن رۆژھلاتێ کوردستانێ بانگ ل وەلاتیێن رۆژھلاتێ کوردستانێ کر کو دەست ب گرەڤێ بکن.
ل رۆژھلاتێ کوردستانێ و ئیرانێ د 16ێ ئیلۆنێ دا پشتی کوشتنا کەچا کوردا 22 سالی “ژینا ئەمینی” یا ژ باژارێ سەقز یێ رۆژھلاتێ کوردستانێ ژ ئالیێ پۆلیسێن ئیرانێ ڤە، خوەپێشاندانان دەست پێ کربوون کو ل گۆری گۆتنێن بابێ وێ، ژینا پشتی کو ژ ئالیێ پۆلیسێن ئیرانێ ڤە ل تەهرانێ ھاتبوو گرتن ژیانا خوە ژ دەست دایە.
ئەڤ نە جارا یەکەمە کو ل رۆژھلاتێ کوردستانێ گرەڤ تێ لدارخستن. رۆژا 19/9/2022ێ ل باژارێن سەقز، سنە، مەھاباد، شنۆ، نەغەدە، پیرانشار، دیواندەرە، بۆکان، مەریوان و ھندەک دوکان و بازارێن کامێران و سەردەشتێ ژی دوکان و بازار ھاتن گرتن.
هەر وها د 12ێ جۆتمەھا 2022یێ دا ل ھندەک باژارێن رۆژھلاتێ کوردستانێ جارەکا دن وەلاتیان ب گرتنا بازار و دوکانان دەست ب گرەڤێ کرن.
