سەرۆککۆمارێ ترکیایێ رەجەب تەییب ئەردۆگان ل دیاربەکرێ میتینگەک ل دار خست. د میتینگێ دا ئەردۆگان دا زانین کو دێ گرتیگەھا دیاربەکر بیتە مووزەخانە. چاڤدێرێن سیاسی دەربارێ ئاخافتنا ئەردۆگان دا گۆتن، ئاخافتنەک قەلس بوو و بەحسا چارەسەریا پرسگرێکێن کو خەلک ل بەندێ بوو، نەکر.
رەجەپ تەییب ئەردۆگان سەردانا خوەیا بۆ دیاربەکر کو ھاتبوو پاشخستن پێک ئانی. سەرۆککۆمارێ ترکیایێ د قادا ئیستاسیۆنێ دا میتینگەک ل دار خست و 140 پرۆژەیێن 12 ملیار لیرەیێن ترکی لێ ھاتی خەرجکرن، ڤەکر. ئەردۆگان د ئاخافتنا خوە دا دا زانین دێ گرتیگەھا دیاربەکر بیتە مووزەخانە. چاڤدێرێن سیاسی دەربارێ ئاخافتنا سەرۆککۆمارێ ترکیایێ دا ئاماژە کرن کو ئاخافتنەک قەلس بوو و گەلەک خالێن کو کورد چاڤەرێ بوون نەھاتن رۆژەڤێ.
چاڤدێرێ سیاسی «نەوزاد بینگۆل» ژ بۆ کوردستان 24 دیار کر: “بەریا میتینگا ژ بۆ کو بەشداری زێدە بببیت د ناڤا جڤاکێ دا ھێڤی تێن چێکرن، ئەڤ یەک پێک ھات ئیرۆ. ئاک پارتیێ ھێڤی دان جڤاکێ و بەشدارییەک زێدە ھەبوو لێ دەربارێ پەروەردەھیا زمانێ زکماکی دا، دەربارێ پێڤاژۆیا چارەسەریێ دا تشتەک نەھات گۆتن. قەت نەبە مە دگۆت قەی دێ بێژە دەربارێ ھژمارا زارۆکان دا گۆتنێن وی خەلەت ھاتنە فام کرن. لێ ئەڤ ژی نەگۆت. بیا من ئاخافتنەک قەلس بوو. مژارا گرتیگەھا دیاربەکرێ ژی ژ خوە بەرێ ھاتبوو گۆتن.”
وەلاتیێن کو بەشداری میتینگا سەرۆککۆمارێ ترکیایێ رەجەب تەییب ئەردۆگان بوون ئانین زمان کو ئەو ژ ئاخافتنا ئەردۆگان کێفخوەش بوون، بەشەک ژ بەشداران ژی ژ بەر کو ترکی نەدزانین ژ ئاخافتنێ فام نەکرن.
وەلاتیەکی دیار کر: “نامەیێن سەرۆککۆمار گەلەک باش بوون، ئەنەرژیەکا باشا وی ھەبوو. ئەز ژ سەرۆککۆمار دخوازم د چارەسەریا پرسگرێکان دا خەلکێ کورد و روسپیێن کورد وەک موخاتەب ناس بکە. بەرێ د موخاتەبیەتێ دا پرسگرێک ھەبو ژ بەر وێ نەچوو سەری.”
ھەروھا وەلاتیەکی دن ژی گۆت: “ھەر تشت گۆت. لێ من نەکاری بچم جەم وی فۆتۆگرافێ بکێشم. من ژ ئاخافتنا وی تشتەک فام نەکر. ژ بەر کو ئەو ترکە، ئەز کوردم.”
د ئاخافتنا ئەردۆگان دا خالەکا دن یا بالکێش ئەو بوو کو ئەردۆگان گۆت سەلاحەدین دەمیرتاش و ھەڤسەرۆکەکێ ھەدەپێ نە کوردن و چ تێکلیا وان ب کوردایەتیێ ڤە تونەیە، لێ کوردان ژ بۆ بەرژەوەندیێن خوە ب کار تینن.
