ھێزێن ئەولەکاریێ یێن ترکیەیێ ب سەر دو ئاژانسێن مەزۆپۆتامیا و ژن نیوس دا گرتن و ھەژمارەکا رۆژنامەڤان بنچاڤکرن.
ھات راگھاندن، د چارچۆڤەیا لێپرسینەکێ دا کو ژ ئالیێ سەردۆزگەریا کۆمارێ یا ئەنقەرەیێ ڤە دھات برێڤەبرن، ھێزێن ئەولەکاریێ ل باژارێن ستەنبۆل، ئەنقەرە، دیاربەکر، وانێ و رحایێ ب سەر نڤیسگەھێن ئاژانسا “مەزۆپۆتامیا” و “ژن نیوس” دا گرتن.
ل گۆر زانیاریان، ھەری کێم حەفت رۆژنامەڤان ھاتنە بنچاڤکرن.
د چارچۆڤەیا لێپرسینێ دا ل ناڤچەیا «کایاپنار» یا دیاربەکرێ ب سەر مالا نووچەگھان «سەلمان گوزەلیوز» و ل وانێ ژی مالا «ھاکان یالچن» ھاتن گرتن و ئەو ھەر دو ھاتن بنچاڤکرن.
ل دیاربەکرێ ب سەر مالا نووچەگھانا ژن نیوسێ «ھابیبە ئەرەن» یا ل ناڤچەیا کایاپنارێ دا ھات گرتن. پشتی لێگەرینان، نووچەگھانێن ژن نیوسێ ھابیبە ئەرەن و دەریا رەن ھاتن بنچاڤکرن.
د چارچۆڤەیا ھەمان لێپرسینێ دە نووچەگھانا ژننەوسێ ئۆزنوور دەگەر ژی ل قۆسەرا مێردینێ د سەردەگرتنا مالا وێ دە ھات بنچاڤکرن.
پۆلیسان ل روحایێ ژی ئاڤێتن سەر مالا نووچەگھان ئەمروللاھ ئاجار. پشتی لێگەرینێن ل مالێ، ئاجار ھات بنچاڤکرن. ھەر وھا ھات زانین کو ل ناڤچەیا «دارگەچیت» یا مێردینێ ب سەر مالا مالباتا «ئاجار» دا ھاتیە گرتن و گەلەک پرتووک ژی ھاتنە دەستەسەرکرن.
ل ستەنبۆلێ ب سەر مالا رێڤەبەرێ کارێن نڤیسێ یێ ئاژانسا مەزۆپۆتامیایێ «دیرەن یورتسەڤەر» دا ھات گرتن. د سەردەگرتنا مالان دا گەلەک پرتووک ھاتن دەستەسەرکرن. یورتسەڤەر پشت را ھات بنچاڤکرن.
