ھەیەت تەحریر ئەل-شام و گرووپێن ھەڤپەیمانێن وێ (سولتان سلێمان شاھ و ھەمزات) باجێ (زەکاتێ) ل سەر زەیتا جۆتکارێن عەفرینێ فەرز دکن. چەکدارێن ئۆپۆزیسیۆنا سووریێ یێن سەر ب ترکیێ ڤە، ب فەرزکرنا باجان ل سەر خەلکێ عەفرینێ و دزینا بەرھەمێن زەیتوونان بەردەوامن.
ھەیەت تەحریر ئەل-شامێ کو نێزیکی دو ھەفتەیانە دەرباسی عەفرینێ بوویە و دەست دانینە سەر گوندێن عەفرینێ، د بن ناڤێ (زەکاتا زەیتێ) دا باج ل سەر خەلکێ عەفرینێ فەرز کرنە. خەلکێ عەفرینێ ژی دبێژن کو تاوان و بنپێکرنێن مرۆڤی کێم نەبوونە و ھەر دزی، تالان، فەرزکرنا باجان و قوتکرنا داران بەردەوامن و چ جوداھیێ د ناڤبەرا ھەیەت تەحریر ئەل-شام و گرووپێن ئارتێشا نشتمانی یا ئۆپۆزیسیۆنا سووریێ دا نینە.
ل گۆری چالاکڤانێن عەفرینێ، چەکدارێن ھەیەت تەحریر ئەل-شام ب ھەڤاھەنگیا لگەل کۆما سولتان سلێمان شاھ (ئەمشات)، باجا 5 % ژ بەرھەما زەیتوونان د بن ناڤێ “زەکاتێ” دا ل گوندێن شەکاتکا، ئەرەندێ، مستکا و کێلا یێن ناڤچەیا شیێ سەپاندنە.
ھەر ل ناڤچەیا شیێ، چەکدارێن سولتان سلێمان شاھ ژی، باجا 10 دۆلار ل سەر ھەر دارەکە زەیتوونان یا کۆچبەران و باجا 5 دۆلار ل سەر ھەر دارەکە زەیتوونان یا کەسێن ل گوندێ خوە مانە فەرز کرنە.
ھەر وھا چەکدارێن گرووپا ئەمشات ل گوندێ ئەرەندێ یێ ل ناڤچەیا شیێ، بەرھەمێن 200 دارێن زەیتوونان دزینە.
ل ناڤچەیا جندرێسێ، چەکدارێن فرقەیا ھەمزات باجا دراڤی ل سەر جۆتکارێن گوندێن ناڤچەیا جندرەسێ فەرز کرنە. باجا % 50 ل سەر دارێن کۆچبەرێن عەفرینێ و % 25 ل سەر جۆتکارێن ل گوندێ خوە مانە فەرز کرنە.
ھەر ل وێ ناڤچەیێ، بەرھەمێن 50 دارێن زەیتوونان ھاتنە دیزین و 10 دارێن ژنەکە ژ گوندێ یەلانقۆزێ ھاتنە قوتکرن.
ل ناڤچەیا راجۆ، گرووپا چەکدار یا ب ناڤێ محەمەد ئەل-فەتح یا سەر ب ئۆپۆزیسیۆنا سووریێ ڤە، باجا نیڤا بەرھەما زەیتوونا ل سەر جۆتکارێن گوندێ مەملا یێ ناڤچەیا راجۆ فەرز کرنە.
ل ناڤچەیا مابەتا ژی، چەکدارێن گرووپا سقور ئەل-شەمال بەرھەما نێزیکی 800 دارێن زەیتوونان ل گوندێن کامرووک و ئەڤرازێ یێن ل ناڤچەیا مابەتا دزینە.
ھەرێما ئەفرینێ کو ب دارێن زەیتوونان ناسکری یە و نێزیکی 20 ملیۆن دارێن زەیتوونێ لێ ھەنە، ژ دەما داگیرکرنا وێ ھەرێمێ د 18ێ ئادارا 2018 دا، ئارتێشا ترکیێ و گرووپێن چەکدار ڤە ژ بلی کو دەستێ خوە دانینە سەر ب ھەزاران دارێن زەیتوونان، ب سەدھەزاران دارێن خەلکێ ژی ھلکرنە، برینە و شەوتاندنە. ل گۆری مەدیایا ناڤدەولەتی، بەرھەمێن زەیتوونان بوونە چاڤکانیەکە داھاتێ ژ بۆی گرووپێن چەکدار.
