پارتیا کۆماری یا گەل (جەهەپە) ژ بۆ کو دەنگێن کوردان بستینە سەردانێن بۆ باژارێن باکورێ کوردستانێ زێدە دکە، لێ نڤیسکار و شیرۆڤەکار دبێژن ھەژمارا سەردانان زێدە دبە، لێ پرۆژە و گۆتنێن بۆ چارەسەریا پرسا لورد لاواز دمینن.
پارتیا کۆمارییا گەل (جەهەپە) ب شاندەیەکێ سەردانا دیاربەکر کر و د سەردانێ دا بۆ بیرئانینا “تاھیر ئەلچی” بەر منارەیا چارلنگ داخویانیەک ھات دایین و پاشێ ژی ل بەر ئاڤاھیا جەهەپێ یا دیاربەکر ل سەر ئۆتۆبیسێ میتینگەک ژی ھات ل دارخستن.
د سەردانا جەهەپێ یا دیاربەکر دا رایەدارێن جەهەپێ بەرسڤا پرسێن وەک پشتگریا ئەحمەد تورک بۆ کەمال کلچدارئۆغلو، پەروەردەھیا زمانێ زکماکی دان و گۆتنێن سەرۆکۆمار کو گۆتبوو پرسا کورد نەمایە نرخاندن.
سەرۆکا شاخا ژنان یا جەهەپێ “ئایلین نازلاکا” ژ بۆی کوردستان24ێ دیار کر: “ئەم کەیفخوەشن کو ھەلوەستەک وسا بۆ سەرۆکێ مە ھەیە لێ کاندیدێ سەرۆککۆماریێ دێ ل سەر میزەیێ 6 قۆلی هێتە دیارکرن. پرسا زمانێ زکماکی ژی دێ هێتە گۆتوبێژکرن. سەرۆککۆمارێ ترکیایێ ژ پرسگرێکێن ترکیایێ دوور کەتیە و ھایا وی ژ پرسگرێکان تنەیە، سەرۆککۆمار ب گەف و دارێ زۆرێ خەباتکارێن سازیێن فەرمی تینە میتینگا خوە، ئەو ب ڤان تشتان ڤە مژوولە.”
دەربارێ سەردانێن جەهەپێ و ھەلوەستا جەهەپێ یا چارەسەریا پرسا کورد دا نڤیسکار و شیرۆڤەکارێن کورد دبێژن جەهەپە ھەم ژ بەر رابردویا خوە ھەم ژی ژ بەر دەستھلاتێ ب ئاوایەکێ وێرەک نکارە دەربارێ چارەسەریا پرسا کورد دا گاڤان باڤێژە یان ژی گۆتنێن وێرەک ب کار بینە.
نڤیسکار نووری سنر ژ بۆی کوردستان24ێ دیار کر: “جەهەپە نەوێرەکە و نە ژدلە، یێن کو جەهەپە برێڤە دبن ئیتتیحادچی نە، نە ئەو کەسێن کو ئەم وان دبیننن. بریارێن جەهەپێ ژ ئالیێ کەمالیست و ئیتتیحادچیان ڤە تێن دایین.”
ئالیەک دنێن شیرۆڤەکار و سیاسەتمەدارێن کورد ژی د وێ باوەریێ دا نە کو کەمال کلچدارئۆغلو روویێ نەرم و دەمۆکراتێ جەهەپێ یە و ئەگەر جەهەپە بهێتە دەستھلاتێ دێ سەرۆکاتی ژ کلچدارئۆغلو هێتە ستاندن و دێ نێرینا کەمالیزمێ ب تەمامی د جەهەپێ دا جیبجی ببە.
