خوەپیشاندەران دەست دانا سەر قایمەقامی و چەند بارەگەھێن رەژیما ئیرانێ یێن ل مەھابادێ

خوەپیشاندەران دەست دانا سەر قایمەقامی و چەند بارەگەھێن رەژیما ئیرانێ یێن ل مەھابادێ

د بەردەوامیا سەرھلدانا گەلێ رۆژھلاتێ کوردستانێ و ئیرانێ ل دژی رەژیما تەھرانێ، ل باژارێ مەهاباد یێ سەر ب پارێزگەها ئۆرمیێ خوەپێشاندەران دەست دانا سەر قایمەقامی، شارەداری، کۆمیتەیا ئالیکاریێ، دارایی، ناڤەندا پۆلیسێ 11، ناڤەندێن بەسیج و چەند بانکێن رەژیمێ.

ژ بۆ تۆلھلدانا شەھیدبوونا ئیسماعیل مەولوودی، ناسکری ب سمکۆ، کو رۆژا چارشەمبێ د چلەیا کوشتنا ژینا ئەمینی دا ب تەقەیا راستەراستا چەکدارێن سەر ب رەژێما ئیرانێ ھات کوشتن، خوەپیشاندەرێن مەھابادێ ئێریشی چەند سازیێن رەژیمێ ل وی باژاری کرن و شەوتاندن.

پێشتر رێخستنا مافێ مرۆڤان یا ھەنگاو راگھاندبوو کو د سەرھلدانا شەڤا بۆری یا مەھاباد و سنە دا ھەری کێم 2 وەلاتیێن ب ناڤێ «ئیسماعیل مەولوودی و محەمەد شەریعەتی» ب تەقەیا راستەراستا چەکدارێن سەر ب رەژێما ئیرانێ ڤە ھاتنە کوشتن.

ھانگاو راگھاند، ل دەما خوەپێشاندانا شەڤا چارشەمبێ، 26/10/2022یێ ل باژارێ سنە، جوانەکی 21 سالی ب ناڤێ محەمەد شەریعەتی ل تاخا “کەمەربەندی 25” یا باژارێ سنە ژ ئالیێ ھێزێن چەکدارێن ئیرانێ ڤە ھات کوشتن.

ژ ئالیێ دن ڤە جوانەکی دنێ ب ناڤێ «ئیسمایل مەولوودی» یێ بەرنیاس ب سمکۆ یێ 35 سالی رۆژا چارشەمبێ ل مەھابادێ ژ ئالیێ ھێزێن چەکدارێن ئیرانێ ڤە ھات شەهیدکرن. خوەپێشاندانا ئیرۆ یا مەھابادێ ژ بۆ تۆلھلدانا شەھید سمکۆ ھات لدارخستن.

شەڤا بۆری تەرمێ سمکۆ ل سەر ملێن خەلکی ب درووشمێن نەتەوی بەر ب مزگەفتێ ڤە ھاتە برن و ئیرۆ دانێ سبێ ژی د ناڤ گرسەیا خەلکێ باژارێ مەھابادێ دا و ب درووشمەیێن نەتەوی ل دژی رەژیما تەھرانێ و جاش و خیانەتکاران، ب ئاخا پیرۆزا کوردستانێ ھاتە سپارتن.

ب ھەزاران کەس بەشداری مەراسیما ئۆغرکرنا شەھید سمکۆ بوون و ب دەھان درووشمەیێن ل دژی رەژیما فاشیستا ئیرانێ و جاشا ھاتن بەرزکرن و گەل ل سەر گۆرا شەھید سروودا “ئەی رەقیب” خوەندن و کین و ھێرسا خوە ئانین زمان.

دوھ ل ئورمیێ، مەھاباد، بۆکان، سەقز، دیواندەرە، مەریوان، سنە، قوروە، کامران، روانسەر، کرماشان، قەسرا شیرین، لۆرستان، ئیلام و چەند باژارێن دنێن رۆژھلاتێ کوردستانێ، خەلک داکەتن قادان و چەکدارێن رەژیما ئیرانێ ل پرانیا باژارێن رۆژهلاتێ کوردستانێ راستەراست گولـلە بەردانە خوەپێشاندەران، ل گۆر ئاگاهیێن ھانگاو، ب دەھان کەس ل کرماشان، سنە، سەقز، بۆکان، مەریوان، قوروە و مەھابادێ بریندار بوونە.

هندەک ژ چاڤکانیێن نووچەیان باس ل وێ یەکێ دکن کو دو وەلاتیێن دنێن کورد ل باژارێن سنە و مەھابادێ ھاتنە کوشتن.

د بەردەوامیا خوەپێشاندانێن پێشوازیکرنا چلەیا “ژینا ئەمینی” دا، ژ بلی باژارێن رۆژھلاتێ کوردستانێ، ل پرانیا باژارێن ئیرانێ خوەپێشاندانێن بەرفرەھ ھاتن لدارخستن.

ل گەلەک دەڤەرێن تەھرانا پایتەختا ئیرانێ، خوەپێشاندەران درووشمێن “بمرە خامنەیی” بەرز کرن.

د ڤێ ناڤبەرێ دا ل دەھان باژارێن دنێن ئیرانێ گەل ل دژی رەژیما ئیسلامی داکەتن قادان.

دو ئەندامێن ئیستخباراتا سوپایێ پاسدارێن ئیرانێ ژی ل دەما تەپەسەرکرنا خوەپیشاندەران هاتن کوشتن.

ل گۆری ئاژانسێن نووچەیان، شەڤا دەرباسبوویی، پاسدار «ئەمیر کەمەندی» د دەما تەپەسەرکرنا خوەپێشاندەران دا ل تەھرانێ ھات کوشتن.

هەر وها ئەندامێ ئیستخباراتا سوپایێ پاسدارێن ئیرانێ «عەلی نەزەری» ژی د ئەنجاما تەپەسەرکرنا خوەپێشاندەران دا ل «مەلایەر» یا پارێزگەھا ھەمەدانێ ھات کوشتن.

ھێزێن سوپایێ پاسدارێن رەژیمێ ب جل و بەرگێن سڤیل ھەول ددن ل کۆلانان ب توندترین شێوە خوەپێشاندەران تەپەسەر بکن، لێ خەلکێ عاجز و دلگران ژ ھێزێن شکەستی ناترسن و ل بەر خوە ددن.

هێژایی گۆتنێ یە دوھ ل شیرازێ ل پەرەستگەھا “شاچراغ” ئێریشەکە چەکداری پێک ھات و ھەری کێم 20 کەس هاتن کوشتن. تەڤی کو پشترە رێخستنا تەرۆریستا داعشێ ئیدیعا کر کو ئەو ئێرش ژ ئالیێ وان ڤە ھاتیە ئەنجامدان، لێ پسپۆرێن رەوشا ئیرانێ د وێ باوەریێ دا نە کو ئەو کریار ژ ئالیێ رەژیما ئیرانێ ڤە ھاتیە ئەنجامدان و ئارمانجا وان ئەوە کو ژ خەلکێ را ببێژن کو ئەگەر رەژیما تەھرانێ ژ ھۆلێ رابە دێ داعش جیێ وێ بگرە.

پوستێن ھەمان بەش