تاوان و پێشێلكاریێن په‌كه‌كێ یێن د راستا خه‌لكێ هه‌رێما كوردستانێ دا تا‌یبه‌ت به‌هدینان چ جار ب داوی نابن، ل دو مه‌هێن رابووری وه‌كه هه‌ر جار رێخستنێ زیانه‌كا مه‌زن ل وه‌لاتیێن سینۆرێ ئاكرێ وئامێدیێ كری یه، ب ئاوایه‌كی كو بوویه به‌لا و سه‌رئێش و به‌ربوویه ده‌ڤه‌رێ.
چاڤكانیێن پێگه‌ها «داركا مازی» كاری پێشێلكاریێن چه‌كدارێن په‌كه‌كێ یێن ل مه‌هێن ته‌باخ و ئیلۆنا ئیسال 2022 ل سینۆرێ ئاكرێ و ئامێدیێ دۆكیۆمێنت بكه‌ت، ل ڤان دو مه‌هان ژی وه‌كه هه‌ر جار رێخستنێ زیانه‌كا مه‌زن ل وه‌لاتیان كری یه، ب دارێ زۆرێ ئۆتۆمۆبیل، په‌ز و به‌رهه‌مێ چاندنیێ ژ جۆتكارێن ده‌ڤه‌رێ ستاندی یه.
پێشێلكاریێن ته‌باخا/2022 ب ڤی ره‌نگی بوون:
1- ل 8/8/2022 مه‌فره‌زه‌یه‌كا په‌كه‌كێ ل ناڤ گوندێ هیزانكا ژێری سه‌ر ب باژارۆكێ چه‌مانكێ، ئۆتۆمۆبیلا وه‌لاتیه‌كی ب ناڤێ حه‌جی مشیر سالح زێباری راگرتی یه، دارێن وی ژێ ستا‌ندینه.
2- چه‌كدارێن په‌كه‌كێ ل مه‌ها 8 یا 2022 رۆژانه مه‌فره‌زه ل گوندێ بێلمه‌ندێ یێ باژارۆكێ چه‌مانكێ ددانان و بارێن داران ژ وه‌لاتیان د ستا‌ندن، هه‌روه‌ها مۆبایلێن وان و پاش كو پشكنین ژ بۆی وان دهات كرن ژ بۆ وان ڤه‌دگه‌راندن.
3- به‌رپرسه‌كێ په‌كه‌كێ كو خوه ب ناڤێ كاوه ددا ناسكرن، ل مه‌ها 8 یا 2022 ل دو وه‌ختێن جودا دو په‌ز ب دارێ زۆرێ ژ دو وه‌لاتیێن گوندێ شه‌هێ یێ سه‌ر ب باژارۆكێ دینارتێ ڤه ستا‌ندن، پشتره ب وان راگه‌هاند كو ئه‌گه‌ر ئه‌و ده‌نگێ خوه بكه‌ن، دێ وان ب داران ڤه گرێ بده‌ن، ئه‌ڤ په‌ز یێن هه‌ر یێك ژ ڤان وه‌لاتیان بوون:
یاسر حه‌سه‌ن زێباری كو ل 26/8/2022 ژێ ستاندی یه، هه‌روه‌ها وه‌لاتی زه‌ید رزگار زێباری كو ل 28/6/2022 په‌زێ وی ژێ ستاند بوو.
پێشێكاریێن ئیلۆنا/2022 ب ڤی ره‌نگی بوون:
1- ل رۆژا 22/9/2022 مه‌فره‌زه‌یه‌كا په‌كه‌كێ ل گوندێ كورتكا گرێدای باژارۆكێ دینارتێ، ئۆتۆمۆبیلا پێشمه‌رگه‌یه‌كی ب ناڤێ شه‌هاب میرزا مسته‌فا زێباری كو دار بار كربوون راگرت، په‌كه‌كێ ده‌ست ب سه‌ر ئۆتۆمبۆبیلێ دا گرت و ب خودانێ وێ راگه‌هاندن ئه‌و دێ پاش په‌یوه‌ندیێ ب وی بكه‌ن.
2- چه‌كدارێن په‌كه‌كێ هۆشداری دایه خودانێن ئاشێن ته‌حینێ یێن گوندێن كرستیانان ل دۆلا نه‌هلێ یا ل سینۆرێ چه‌مانكێ كو نابیت هه‌ر یێك ژ 10 بارێن داران زێده‌تر ده‌رباس بكه‌ت.
3- چه‌كدارێن رێخستنێ ل 5/9/2022 ژی ل دووریانا گوندێ بیلمه‌ندێ گرێدای چه‌مانكێ، كامیرایه‌كا ته‌عقیبێ ب دار به‌روویه‌كێ ڤه هه‌لاویستبوو ژ بۆ كو ته‌عقیبا كه‌س و ئۆتۆمۆبیلێن ل وێرێ حه‌ره‌كه‌تێ دكه‌ن، بكه‌ت.
هێژای گۆتنێ یه، ئه‌ڤ هنده‌ك ژ وان پێشێلكاریانه یێن كو رۆژانه خه‌لكێ ده‌ڤه‌رێ ل سه‌ر ده‌ستێ په‌كه‌كێ و چه‌كدارێن وێ ژیان دكه‌ت.
په‌كه‌كه هه‌ر رۆژ ئاسته‌نگییان ژ بۆ خه‌لكێ ده‌ڤه‌را ئامێدیێ و ئاكرێ چێدكه‌ت، باجێ ژ جۆتكاران دستینیت، ب دارێ زۆرێ به‌رهه‌مێ وان یێ چاندنیێ بۆ خوه دبه‌ت، وه‌ختا كه‌سه‌ك ژی نه‌رازیبوونێ نیشان دده‌ت، راستی لێدان و ئیشكه‌نجه‌یا چه‌كدارێن رێخستنێ دبیت.
