تەڤگەرا جوانێن شۆرەشگەر یا سەر ب رێڤەبەریا خوەسەر ڤە زارۆکەکی دن یێ 15 سالی ژ تاخا شێخ مەقسوودا حەلەبێ رەڤاند.
رێخستنا مافێن مرۆڤان ل عەفرینێ بەلاڤ کر، تەڤگەرا جوانێن شۆرەشگەر رۆژا 30ی جۆتمەھا بۆری زارۆکێ 15 سالی یێ ب ناڤێ «شێخمووس ئەبدوللا» یێ ژ گوندێ «مەیدان ئەکبەسا» عەفرینێ رەڤاندیە و ھەتا نھا چارەنڤیسا وی نە دیارە.
وێ رێخستنێ دیار کر کو، شێخمووس پێشتر ژی چەند جاران لگەل ھندەک ھەڤالێن خوە سەردانا بارەگەھا تەڤگەرا جوانێن شۆرەشگەر یا ل تاخا شێخ مەقسوود کربوو.
گۆت ژی: “داییکا شێخمووس سەری ل بارەگەھا جوانێن شۆرەشگەر دا و پرسا کورێ خوە کر، لێ وان رەد کر کو شێخمووس ل جەم وان بە، ژ بەر وێ ژی ئەو ژ ھشێ خوە ڤە چوو و ژ بۆ نەخوەشخانەیێ ھات ڤەگوھاستن.”
تاخێن ئەشرەفیێ و شێخ مەقسوود یێن ھەلەبێ، وەک تاخا کوردان تێ ناسین کو نێزیکی 200 ھەزار کورد و ب تایبەت یێن عەفرینێ لێ دژین، د دەستێ یەپەگە/ھەسەدێ دا یە و رێڤەبەریا خوەسەر ژی لێ ھاتیە راگھاندن.
تەڤی کو ھەسەدێ د خزیرانا 2019ێ دا لگەل نەتەوێن یەکگرتی دا پلانەک ژ بۆ بداویکرن و قەدەغەکرنا تەڤلیکرنا زارۆکان د ناڤا چەکداران دا ئیمزا کربوو. لێ ژ دەما کو پەیمان ھاتیە ئیمزاکرن ڤە، رەوشا رەڤاندنا زارۆکان ب داوی نەبوویە.
مالباتێن زارۆکێن رەڤاندی ژی کریارێن تەڤگەرا جوانێن شۆرەشگەر شەرمەزار دکن و بانگ ل رێخستنێن کو گرینگیێ ددن مافێن زارۆکان، رێخستنێن ناڤدەولەتی و ئالیێن پێوەندیدار دکن کو فشارێ ل رێڤەبەریا خوەسەر و ھەسەدێ بکن تا کو چارەنڤیسا زارۆکێن وان دیار بکن.
