بابە شێخێ ئێزدیان عەلی ئیلیاس راگھاند، پرسا شنگالێ و ئێزدیان کرنە پرسەکا سیاسی و داخوازێ ژ حکوومەتا ئیراقێ و ھەرێما کوردستانێ و جڤاکا ناڤدەولەتی دکە، کێشەیا ئێزدیان چارەسەر بکن.
ئیرۆ چارشەمێ 2یێ مژدارا 2022یێ، بابە شێخێ ئێزدیان و سەرۆکێ جڤاتا رووحانی یا ئێزدیان عەلی ئیلیاس د رۆژا دویەما دیدارا مێری دا ل ھەولێرێ راگھاند، پرسا شنگالێ و ئێزدیان ھاتیە سیاسیکرن و گۆت، ئێدی کێشەیا ئێزدیان کێشەیەکا ناڤخوەیی نینە و داخواز ژ حکوومەتا ھەرێما کوردستانێ و ئیراقێ و جڤاکا ناڤدەولەتی کر، کێشەیا ئێزدیان چارەسەر بکن.
ل سەر جینۆساید ناساندنا کۆمکوژیا ئێزدیان، بابە شێخ رەخنەیێن توند ل حکوومەتا ئیراقێ گرتن و دیار کر، ھەتا نھا ھەرێما کوردستانێ و 11 وەلاتان کۆمکوژیا ئێزدیان ب جینۆساید ناساندنە، لێ بەلێ حکوومەتا ئیراقێ نەکریە و گۆت: “ئەگەر ڤێ یەکێ نەکە، گەلۆ دکارە چ ژ بۆ مە بکە، چاوا کێشەیێن مە چارەسەر بکە و وەلاتیێن مە قەرەبوو بکە؟”
