بەحسا ڤەگەرا په‌ده‌كێ بۆ کەرکووکێ تێ کرن
ل گۆر رێکكەفتنا د ناڤبەرا ئالیێن پێکهێنەرێن حكوومه‌تا نوو یا ئیراقێ دە و کارنامەیا کابینەیا سوودانی، پێویسته د هەیاما 6 مەهێن پێش مه دە هەموو بارەگەهێن ل کەرکووکێ یێن کو هاتنە داگیرکرن بێن ڤالاکرن و په‌ده‌كه ڤەگەرە باژێر.
ئەندامێ کۆنگرەیا 14 یا پارتیا دەمۆکراتا کوردستانێ (په‌ده‌كه) محەمەد خۆرشید ژ ک24ێ رە راگهاند، پرسا ڤەگەرا په‌ده‌كێ بۆ کەرکووکێ، گرێدایی جیبجیکرنا رێکكەفتنا د ناڤبەرا ئالیان دە یە کو ژ بۆ پێکانینا حكوومه‌تا نوو یا ئیراقێ هاتبوو ئیمزە کرن.
دیار کر ژی، ل گۆری وێ رێکكەفتنێ، ئەو خال د کارنامەیا کابینەیا سوودانی دە هات جیبجیکرن و ل پارلامەنتۆیا ئیراقێ هاتیە پەسەندکرن کو پێویسته د هەیاما 6 مەهێن بهێت دە، تەڤاهیا بارەگەهـ و ئاڤاهیێن ل کەرکووکێ هاتنە داگیرکرن، وەرن ڤالاکرن و رەوشا ڤان دەڤەران د وارێ ئیداری و ئەولەهیێ دە وەرە ئاساییکرن.
محەمەد خۆرشید هەر وها تەکەزی ل سەر ڤەگەرا په‌ده‌كێ بۆ کەرکووکێ ژی کر و راگهاند، هەر چەندە پێشتر ئالیێن ئیراقی پشتی ئاڤاکرنا حكوومه‌تێ ل سەر سۆزێن خوە نامینن، لێ ڤێ جارێ ژی ئەوێ هەر هەولەكێ بدن ژ بۆ کو حكوومه‌تا ئیراقێ پابەندی سۆزا کو ل سەر ئیمزە کریە ببە.
محەمەد خۆرشید کو بەری کۆنگرەیا 14 یا په‌ده‌كێ، بەرپرسێ لقێ کەرکووکێ یێ په‌ده‌كێ بوو، راگهاند، نها په‌ده‌كه ل کەرکووکێ ژ بەرێ بهێزترە و فەرقا دەنگێن وێ ل گەل ینکێ، تەنێ 20 هەزار دەنگە.
