ل شنگالێ پەکەکە ونداھیێن خوە د ئێریشێن ھەوایی دا ڤەدشێرە

ل شنگالێ پەکەکە ونداھیێن خوە د ئێریشێن ھەوایی دا ڤەدشێرە

ل شنگالێ پەکەکە ونداھیێن خوە د ئێریشێن ھەوایی دا ڤەدشێرە و گەل بەشداری مەشا ژ ئالیێ پەکەکێ ڤە ھاتی رێکخستن نابە.

د ھەفتەیا داوی دا 4 ئێریشێن ھەوایی ل سەر شنگالێ پێک ھاتن. گەلێ شنگالێ دترسە، پەکەکە بوویەران بەرووڤاژی ددە چاپەمەنیێ. گەل ژ ئێریشێن ھەوایی و ھەلوەستا پەکەکێ بێزار بوویە. ژ بەر ڤێ سەدەمێ تەڤی ھەموو زەختێن پەکەکێ بەشەکێ گەلەک کێم ژ گەل بەشداری مەشا پەکەکێ یا 4ێ مژدارێ یا ل شەنگالێ بوو.

پەکەکە مرۆڤان وەکە مەرتالێن زندی بکارتینە

د ھەفتەیا داوی دا 4 ئێریشێن ھەوایی ل سەر شەنگالێ ھاتن کرن. ھێزێن سەر ب پەکەکێ ڤە، ژ بۆ خوە ژ ئێریشێن ھەوایی بپارێزن گەلێ ھەرێمێ وەکە مەرتال ب کار تینە. ل ناڤ مالێن گەل دمینن و د سازیێن ژ بۆ گەل ھاتنە ڤەکرن دا خوە ب جیھ دکن.

پەکەکە شەرڤانێن ژ باکور و رۆژئاڤا ئانینە شنگالێ، ل بەر چاڤێ چاپەمەنی و رایا گشتی ڤەدشێرە، ناخوازە بهێن دیتن. لێ بەلێ ژ بەر بکارئانینا تەلەفۆن و ئینتەرنەتێ، ژ ئالیێ دەولەتا ترک ڤە تێن شۆپاندن. پەکەکە دخوازە نێزی سێسەد شەرڤانێن نە-ئێزیدی د ناڤ چەند شەرڤانێن ئێزیدی دا دابەشبکە و ڤەشێرە. ھەر وھا گەلەک کادرۆیێن نە ئێزدی ژی د بن ناڤێ خواندنا جوان و ژنان دا ل شنگالێ خەباتێن رێخستنی د مەشینن.

پەکەکە دەربارێ ئەنجامێن ئێرشێن ھەوایی دا ئاگاھیێن دەرەو بالاڤ دکە و ناسنامەیێن وان ڤەدشێرە

پشتی ئێریشا ھەوایی پێھ ھاتی، پەکەکە ناھێلە گەل نێزی جھێ بوویەرێ ببە. ھەژمارا مری و برینداران نەھات زەلالکرن. د راستیێ دا ناسنامەیا کەسێن د بوویەرێ دا ژیانا خوە ژ دەست دانە و بریندار بوونە ژی دهێت ڤەشارتن. ھەری داوی د ئێریشا ھەوایی یا شەڤا 3یێ مژدارێ دا پەکەکێ ب زانابوون ئەنجاما بوویەرێ بەرەڤاژیکر. پەکەکێ ناڤێ شەرڤانێن ژ باکور و رۆژئاڤا یێن کو د بوویەرێ دا ژیانا خوە ژ دەست دانە وەک ئێزدی دەستنیشان دکە یان ژی قەت قالا وان ناکە.

ھەروھا پەکەکە وەکە ھەر جار ھەول ددە کو حکوومەتا ھەرێما کوردستانێ ب ڤان ئێریشان تاوانبار بکە. لێ چ ھێزەکا پێشمەرگە ل ھەرێمێ نەمایە. پەکەکە ژ بۆ کو بەرتەکێن رایا گشتی نەکشینە سەر خوە ب ھێسانی حکوومەتا ھەرێما کوردستانێ تاوانبار دکە.

پەکەکە ب زۆرێ گەل تەڤلی مەشێ دکە

پشتی ھەر بوویەرەکا ل شنگالێ دقەومیت، پەکەکە جەماوەرێ خوە یێ لڤۆک دەردخە کۆلانان، ژ بۆ کو ببێژە گەلێ شنگالێ لگەل من دایە. پەکەکە ڤێ گرسەیا مۆبیل ب وەساییتان ڤەدگوھێزە و درووشمان پێ ددە ئاڤێتن. بەرێ ھەر چەند گەل ھەتا رادەیەکێ بەشدار دبوو ژی، لێ ژ بەر دەرەو و پێکانینێن پەکەکێ بێزار بوونە ئێدی تەڤلی خوەپێشاندانان نابن. د 4ێ مژدارێ دا پەکەکە مال ب مال دگەریا و دخواست گەل کاشی کۆلانان بکە. لێ بەلێ گەل نەچوو. تەنێ کۆمەکا بچووکا زارۆکێن مالباتێن وان ل دەردۆرا پەکەکێ رێخستنکری، د ناڤا یەبەشێ دا خوەدی مووچە، تەڤلی ڤێ مەشە بوون.

رێکەفتنا شنگالێ تێ ئاستەنگکرن

ھەبوونا پەکەکێ و ھەڤکارێ وێ حەشدا شەعبی، رێ نادە کو گەل ڤەگەرن شنگالێ. پەکەکە ژ ئارامی و ئاساییبوونا رەوشا شنگالێ عاجزە، رێ ل بەر جێبەجێکرنا رێکەفتنا شنگالێ یا کو ب جاڤدێرییا نوونەرێ دەولەتێن یێکبوویی د ناڤبەرا حکوومەتا ئیراق و کوردستانێ دا ھاتیە ئیمزاکرن، دگرە. رەوشا ئاوارتە یا شنگالێ ژ بۆ پەکەکێ وەکە دەرفەت دهێت بکارئانن.

پوستێن ھەمان بەش