چاڤدێرێ سیاسی فەرید سادوون دبێژە، “رۆژئاڤایێ کوردستانێ دۆرپێچکری یە، تەنێ ریا ھەرێما کوردستانێ ژ بۆ دەرباسبوونا ئالیکاریێن مرۆڤی ڤەکری یە و دڤێت رێڤەبەریا خوەسەر ئاستەنگیان دەرنەخە.”
ھیومان رایتس وۆچ دوھی د راپۆرتەکێ دە ترکیە ب قوتکرنا ئاڤا چەمێ فرات و ئاڤا وەستگەھا ئەلۆک ل سەر سووریێ تاوانبار کر و گۆت کو ئەڤ یەک دھێلە نەخوەشیا کۆلێرا زێدەتر بەلاڤ ببە و دژوار دکە. ھەر وھا رێژیما سووریێ ژی تۆمەتبار کر کو ئاستەنگیان ل پێش گھیشتنا ئالیکاریێن مرۆڤی بۆ حەسەکێ دروست دکە.
د ڤێ دەربارێ دە چاڤدێرێ سیاسی فەرید سادوون ژ K24ێ رە گۆت: “مژارا ئاڤێ، مژارەکە سیاسی یە. ترکیە یەک ژ وەلاتێن کو راستەراست دەستێوەردانێ د سووریێ دە دکە و دخوازە ب ریا قۆتکرنا ئاڤا چەمێ فرات و وەستگەھا ئەلۆکێ، فشارێ ھەم ل رێژیما سووریێ و ھەم ل رێڤەبەریا خوەسەر بکە. مخابن ترکیە د ململانەیەکە سیاسی دە، کارتا ئاڤێ ل دژی ملەت ب کار تینە کو پرسگرێکەکە توند د وارێ تەندروستی و ئاڤا ڤەخوارنێ دە ژ گەلێ رۆژئاڤایێ کوردستانێ رە دروست کریە.
گۆت ژی: “ل ھەمبەر ڤێ رەوشا کو ترکیێ دروست کریە، حکوومەتا سووریێ ژی لاوازە و نکارە رەوشێ چارەسەر بکە و وەستگەھێن ئاڤێ یێن ھەنە نووژەن بکە و کارمەند و ئالاڤێن پێویست ژێ رە پەیدا بکە.”
تەکەزی ل سەر وێ یەکێ ژی کر، د رەوشا نھا یا نەبوونا ئاڤێ دە، نەخوەشیێن گران و کۆلێرا ل ھەرێمێ بەلاڤ بوونە. رێبەندێن رێژیما سووریێ ئاستەنگیان ل پێش دەرباسبوونا دەرمان و ھەڤکاریێن بزیشکی بۆ ھەرێمێ چێدکن و ئەو ب ھێسانی دەرباسی ھەرێمێ نابن.”
فەرید سادوون ھشیاری دا و گۆت: “رەوشا ھەرێمێ ژ ئالیێ تەندروستی ڤە گەلەکی خراپە و دەرمانێن نەخوەشیان پەیدا نابن. گەلەک نەخوەشخانە ژ بەر نەبوونا دەرمانان، ژ کار دەرکەتنە.”
دەربارێ چارەسەریا ڤێ رەوشێ دە، فەرید سادوون گۆت: “د بن چاڤدێریا ھێزێن رووسیێ ھندەک جاران رێکەفتن ژ بۆ بەردانا ئاڤا وەستگەھا ئەلۆک بۆ حەسەکێ چێدبن. لێ رووسیا ب خوە بەشەک ژ پرسگرێکێ یە. نەتەوێن یەکگرتی د مەھا تەباخێ دە ژ بۆ دەرباسکرنا ئالیکاریێن مرۆڤی بۆ سووریێ جڤیا، لێ رووسیا و چینێ ڤیتۆ ل دژی وێ پرۆژەبریارێ ب کار ئانین. رووسیا دخوازە پرسا دەرباسبوونا ئالیکاریێن مرۆڤی د بن سەرپەرشتیا رێژیما سووریێ دە بە، لێ رێژیما سووریێ ب زەحمەتی رێ ددە کو بەشەک ژ وان دەرمان و ئالیکاریان دەرباسی رۆژئاڤایێ کوردستانێ ببن.”
ل سەر رۆلا رێڤەبەریا خوەسەر د چارەسەرکرنا ڤێ پرسگرێکێ دە، فەرید سادوون گۆت: “کارینێن رێڤەبەریا خوەسەر سینۆردارن، ژ بەر کو سینۆر گرتی نە. سینۆرێ ترکیێ گرتی یە. د ناڤبارا ھەرێمێن رێڤەبەریا خوەسەر و رێژیمێ دە ژی رێبەند ھەنە. تەنێ سینۆرێ ب ھەرێما کوردستانێ رە ڤەکری یە، ژ بەر ڤێ یەکێ ژی دڤێ پێوەندیێن سەرەراست د ناڤبەرا رێڤەبەریا خوەسەر و ھەرێما کوردستانێ دە ھەبن، ژ بۆ کو ھنەکی رەوش باشتر ببە.”
ھەر وھا گۆت ژی: “ھەرێما کوردستانێ و دەزگەھا خێرخوازی یا بارزانی گەلەک ئالیکاری شاندنە رۆژئاڤایێ کوردستانێ. دڤێ رێڤەبەریا خوەسەر ئاستەنگیان دەرنەخە ژ بۆ دەرباسبوونا ئالیکاریان. ژ رێڤەبەریا خوەسەر تێ خواستن کو رێ ل پێش دەرباسبوونا ئالیکاریان ژ ھەرێما کوردستانێ خوەش بکە.”
