جوانەکی کورد یێ باشوورێ کوردستانێ کو خوەندەکارێ زانینگەھا باژارێ ئەھوازێ یا ئیرانێ بوو و بەری چەند رۆژان راستی ئێرشەکا ب کێران ھاتبوو و ب گرانی بریندار بووبوو، جانێ خوە ژ دەست دا.
بەشار فایق بەرگارەیی کو خەلکێ قەزایا بەردەرەش یا ھەرێما کوردستانێ و خوەندەکارێ سالا دویەم یێ فاکولتەیا بزیشکی یا زانینگەھا شاپوور یا باژارێ ئەھواز یێ ئیرانێ بوو، شەڤا 4ێ مژدارێ راستی ئێریشەکا ب کێران ژ ئالیێ چەند کەسان ڤە ھاتبوو و ب گرانی بریندار بووبوو، ئیرۆ ل نەخوەشخانەیێ جانێ خوە ژ دەست دا.
محەمەد مەھدی کو ھەڤالێ بەشار فایقە و ل نەخوەشخانەیێ ب بەشار فایق رە بوو ئەشکەرە کر، پشتی کو 4 نەشتەرگەری ژ بۆ بەشار ھاتن کرن، ئیرۆ دانێ سبێ جانێ خوە ژ دەست دا.
بەشار فایق ژ بۆ کرینا ھندەک پێدڤیێن رۆژانە چووبوو بازارێ، چەند کەسان رێیا وی گرتن و تەلەفۆنا وی و پارە ژ وی خواستن، لێ وی قەبوول نەکر، لەوما وان ب کێران ئێرشی وی کرن و ب گرانی بریندار کرن.
