شاندەکە وەزارەتا دەرڤە یا ئه‌مەریکایێ ب ئەنکسێ رە جڤیا

ENKS-USA-Rojava-kurdistan

شاندەکە وەزارەتا دەرڤە یا ئه‌مه‌ریكایێ ب ئەنجوومەنا نشتمانی یا کورد ل سووریێ (ئەنکس) رە جڤیا.

شاندەکە وەزارەتا دەرڤە یا ئه‌مه‌ریكایێ ب سەرۆکاتیا جیگرێ ئالیکارێ وەزیرێ دەرڤەیێ ئه‌مه‌ریكایێ بۆ کاروبارێن رۆژهلاتا نێزیک ئەتهان گۆلدرچ ب بەرپرسێن ئەنکسێ رە هەڤدیتن پێک ئانی.

د جڤینێ دە ژ ئالیێ ئەنکسێ ڤە ئیبراهیم برۆ و ئەبدولحەکیم بەشار ئامادە بوونە.

بالیۆزخانەیا ئه‌مه‌ریكایێ ل شامێ د داخویانیەکە کورت دە کو ل سەر حەسابا خوە یا فەرمی یا ل فه‌یسبووكێ بەلاڤ کریە، ئاماژە ب جڤینا شاندا ئه‌مەریکایێ یا ب ئەنکسێ رە کریە و راگهاندیە، «گۆلدرچ ب نوونەرێن ئەنجومەنا نشتیمانی یا کوردی رە جڤیا و ل سەر گەشەدانێن ل باکورێ سووریێ، لهەڤکرنا ناڤ کوردان، رەوشا پەنابەر و ئاوارەیان و مەترسیا داعشێ یا بەردەوام گۆتووبێژ کرن».

وێ شاندا وەزارەتا دەرڤە یا ئه‌مه‌ریكایێ هەروها سەردانا رۆژئاڤایێ کوردستانێ ژی کر و ل قامشلۆ ب فەرماندارێ گشتییێ هێزێن سووریەیا دەمۆکراتیک (هسد) مەزلووم کۆبانی و فەرماندارا گشتی یا یەکینەیێن پاراستنا ژنێ (یپژ) نەورۆز ئەحمەد رە هەڤدیتن پێک ئانی.

د جڤینێ دە رەوشا سیاسی، ئەولەهی و ئابۆری یا ناڤچەیێن رۆژئاڤایێ کوردستانێ و باکور و رۆژهلاتێ سووریێ هات گۆتووبێژکرن. ل گۆری زانیاریان هەردو ئالیان د جڤینێ دە تەکەزی ل سەر گرینگیا ئەولەهی، ئارامی و رێکەفتنا ئاگربەستێ ل باکور و رۆژهلاتێ سووریێ کرنە.

سەرۆکێ شاندێ ئەتهان گۆلدرچ ژ فەرماندارێ هسدێ رە گۆت کو، ئەو ب دەولەتێن پێوەندیدار رە د تێکلیێ دە نە، ژ بۆ وەلاتیێن خوە ژ هەردو کامپێن هۆل و رۆژ ڤەگەرینن، کو ب هەزاران گرتی ژ چەکدارێن داعشێ ل وان دەران هەنە.

پوستێن ھەمان بەش