د سیاسەتا ترکیێ دا کارڤەدانێن سەردانا ئاک پارتیێ بۆ ھەدەپێ بەردەوامن

د سیاسەتا ترکیێ دا کارڤەدانێن سەردانا ئاک پارتیێ بۆ ھەدەپێ بەردەوامن

ل ترکیێ ھلبژارتن نێزیک دبن. ھەم د ناڤا دەستھلاتێ دا، ھم ژی د ناڤ تفاقا ئۆپۆزیسیۆنێ دا، پارتیەک نەتەوپەرەست ھەیە. ژ بەر مەھەپێ، ل ئالیێ دەستھلاتێ، IYI  پارتی، ل ئالیێ ئۆپۆزیسیۆنێ، وسا خویایە کو ھەر دو ئالی ژی نەوێرن خوە نێزیکی کوردان بکن. لێ ل گۆری شیرۆڤەیان نھا دەستھلات دوبارە پێنگاڤەکێ بەر ب ھەدەپێ ڤە دهاڤێژە. ئۆپۆزسیۆن ژی، ژ ڤێ یەکێ عاجز خویا دکە.

پشتی پێشنیازا یاسایا ئازادیا سەرپۆشێ یا سەرۆکێ جەهەپێ کەمال کلچدارۆغلو، بانگا سەرۆک کۆمارێ ترکیێ رەجەپ تەییب ئەردۆگان بۆ گوھەرتنا دەستوورا بنگەھین، رۆژەڤا سیاسەتا ترکیێ یە. ھەفتەیا بۆری ب سەرۆکاتیا وەزیرێ دادێ بەکر بۆزداگ شاندەیەک ژ ئاک پارتی بۆ گوھەرتنا دەستوورا بنگەھین ل پارلەمەنتۆیێ سەرەدانا مەھەپێ، جهەپێ، IYI  پارتی و ھەدەپێ کربوو.

سەرەدانا ئاک پارتی بۆ ھەدەپێ وەک پێنگاڤەک ئەرێنی ژ ئاک پارتی بۆ ھەدەپێ ھات نرخاندن. پشترە شریکێ نەتەوپەرەستیێ دەستھلاتێ مەھەپێ ژی گۆت، “سەرەدانا ئاک پارتی بۆ ھەدەپێ پێنگاڤەک ئاسایی و راستە. “

لگەل وان گەشەدانان پرسەک نوو دەرکەتە ھۆلێ. پشتی پێوەندیێن کو ب سالانە خراب د ناڤبەرا ھەدەپێ و دەستھلاتێ دا، سەرەدانا ئاک پارتی و پشتگریا مەھەپێ بۆ سەرەدانێ، چ واتەیەک ھەیە؟

شیرۆڤەکارا سیاسی تاجیرە باکتاش ژ بۆ کوردستان 24ێ دیار کر: “دەستھلات گرینگیا پشتەڤانیا دەنگدێرێن کورد دبینە. ئۆپۆزیسیۆن ژی دبینە لێ ئەو ناوێرن خوە نێزی کوردان بکن. ل ئالیەکی تفاقەکا بھێز یا دەستھلاتێ، ل ئالیێ دن تفاقەکا لاواز و بکێشەیا ئۆپۆزیسیۆنێ ھەیە. ھەوجەیە ھەدەپە ژ رابردوویا خوە دەرسەکێ فێر ببە و ل دوو ئۆپۆزیسیۆنا کو ناوێرە ناڤێ کورد بینە زمان نەچە.”

ئۆپۆزسیۆنا ترکیێ، عاجزیا خوە ژ گەشەدانێن د ناڤبەرا ئاک پارتی و ھەدەپێ دا ب رێیا داخویانیێن خوە دیار کر. ئالیێن نێزی حکوومەتێ ژی بالێ دکشینن سەر ڤێ ھەلوەستا ئۆپۆزیسیۆنا ترکیێ.

سەرۆکێ دەزگەھا راپرسیێن جڤاکی «ئۆپتیمارێ» حلمی داشدەمیر ژ بۆ کوردستان 24ێ دیار کر: “ئۆپۆزیسیۆن ناخوازە لگەل ھەدەپێ لسەر ماسەیەکێ روونە، لێ دخوازە ژ ھەدەپێ سوودێ وەربگرە. گەل وان ناکۆکیان دبینە. ل گۆری راپرسیێن مە نێرینا بەشا مەزن یا کوردان ئەڤە کو ل ترکیێ تەنێ ئەردۆگان دکارە کێشەیا کوردان چارەسەر بکە.”

پرۆسەیا دویەمیا چەرەسەریێ نەیێ چاڤەرێکرن ژی گەلەک شیرۆڤەکار ب باوەرن کو دەستھلات ب بەشداربوونا مەھەپێ ژی د سیاسەتا کورد دا، نەخشەرێیەک نوو دیار دکە. ب ڤێ رێیێ پشتگریا ھەدەپێ ب تەمامی نەستینە ژی، دبە کو دەنگێن کوردێن کو ژ ئاک پارتی ڤەقەتیایی ژ پاش ڤە بستینە.

ھەدەپێ د داخویانیێن خوە دا لگەل رەخنەکرنا دەستھلاتێ رێیێن بۆ دانووستاندنان نەگرتن. تاوانبارکرنا ھەدەپێ ژ ئالیێ ئۆپۆزیسیۆنا ترکیێ ڤە رایەدارێن ھەدەپێ عاجز دکە. بەر ب ھلبژارتنان ڤە راپرسیێن جڤاکی ژی نیشان ددن کو ڤەقەتینا ھەدەپێ و دەنگدێرێن کورد ژ ئۆپۆزیسیۆنێ، بسەرکەفتنا دەستھلاتێ ب خوە رە تینە.

پوستێن ھەمان بەش