جیگرێ ئالیکارێ وەزیرێ دەرڤەیێ ئامەریکایێ بۆ کاروبارێن رۆژھلاتا ناڤین ئیتان گۆلدریچ لگەل بەرپرسێن ئەنەکەسێ دا ھەڤدیتنەک پێک ئانی. ژ ئەنەکەسێ ئیبراھیم برۆ و عەبدولحەکیم بەشار د جڤینێ دا بەشداربوون.
بالیۆزخانەیا ئامەریکایێ ل شامێ ل سەر حەسابا خوەیا فەیسبۆکێ بەحسا ڤێ جڤینێ کر. بالیۆزێ ئامەریکایێ ل شامێ دبێژە؛ “گۆلدریچ لگەل نوونەرێن ئەنجومەنا نشتیمانی یا کوردی دا جڤیا و ل سەر گەشەدانێن ل باکورێ سووریێ، لھەڤکرنا ناڤ کوردان، رەوشا پەنابەر و ئاوارەیان و مەترسیا داعشێ یا بەردەوام گۆتووبێژ کرن.”
وێ شاندا وەزارەتا دەرڤەیا ئامەریکایێ ھەروھا سەردانا رۆژئاڤایێ کوردستانێ ژی کر و ل قامشلۆ لگەل فەرماندارێ گشتی یێ ھەسەدێ مەزلووم کۆبانی و فەرماندارا گشتی یا یەکینەیێن پاراستنا ژنێ (یەپەژێ) نەورۆز ئەحمەد دا ھەڤدیتن پێک ئانی.
د جڤینێ دا رەوشا سیاسی، ئەولەھی و ئابۆری یا ناڤچەیێن رۆژئاڤایێ کوردستانێ و باکور و رۆژھلاتێ سووریێ ھات گۆتووبێژکرن. ل گۆری زانیاریان ھەر دو ئالیان د جڤینێ دا تەکەزی ل سەر گرینگیا ئەولەھی، ئارامی و رێکەفتنا ئاگربەستێ ل باکور و رۆژھلاتێ سووریێ کرنە.
سەرۆکێ شاندێ گۆلدریچ ژ فەرماندارێ ھەسەدێ را گۆت کو ئەو لگەل دەولەتێن پێوەندیدار دا د تێکلیێ دا نە، ژ بۆ وەلاتیێن خوە ژ ھەردو کامپێن ھۆل و رۆژ ڤەگەرینن، کو ب ھەزاران گرتی ژ چەکدارێن داعشێ ل وان دەران ھەنە.
