بەردەوامیا بڕینا ئاڤا وێستگەھا ئەلۆک ژ سەر حەسەکێ و گوندەوارێن وی باژاری، بوویە سەدەما کریزا ئاڤێ ل وان دەڤەران.
ھەڤسەرۆکا رێڤەبەریا ئاڤێ ل باژارێ حەسەکێ، راگھاندیە کو، نشتەجیێن حەسەکێ و گوندەوارێن وێ، ژ بەر نەبوونا ئاڤا ڤەخوارونێ دنالن و ئێش و ئازارێن وان بێھتر دبن.
ل گۆری گۆتنا ھەڤسەرۆکا رێڤەبەریا ئاڤا حەسەکێ، گارانتۆرێ رووسی، ل بەرامبەر ڤێ رەوشا زەحمەت بێدەنگ مایە.
ھەڤسەرۆکا رێڤەبەریا ئاڤێ یا باژارێ حەسەکێ نەوار سەبری دبێژە “د دەما داوی دە و ل ژێر سیبەرا بڕینا گشتی یا ئاڤا وێستگەھێ، پەیداکرنا ئاڤێ ب رێیا تانکەران دبە.”
ھەڤسەرۆکا رێڤەبەریا ئاڤێ یا باژارێ حەسەکێ، نیشانێ ب وێ یەکێ ددە کو، نێزیکا یەک ملیۆن و 500 ھەزار کەسان پێویستیا وان ب ئاڤا وێستگەھا ئەلۆک ھەیە، لەوما ئەو داخواز دکن کو ئەو وێستگەھ وەکە بێلایەن بمینە.
نەوار سەبری راگھاند “ئەم بەردەوام دەنگێ خوە دگھینن نەتەوەیێن یەکبوویی، رێخستنان، رێخستنا مافێن مرۆڤان، و ھەر کەسێ کو بیر ل ئالیێ مرۆڤێ ژ ڤێ ئازارکێشیێ بکە، ژ بۆ بێلایەنکرنا وێستگەھا ئەلۆک، ژ بۆ گھاندنا ئاڤا ڤەخوارنێ بۆ حەسەکێ، لێ مخابن ئەم کەسەکی نابینن کو دەنگێ مە بکە یان بەرسڤا ڤێ بانگەوازیێ بدە یان ب جددی ل بەر بێلایەنکرنا وێستگەھا ئەلۆک راوەستە.”
ژ جۆتمەھا 2019ێ ڤە، ئانکو پشتی داگیرکرنا ناڤچەیا سەرێ کانیێ و گرێ سپی ژ ئالیێ ترکیێ و گرووپێن چەکدار ڤە، ھەتا نھا، ھێزێن ترکیێ و گرووپێن چەکدارێن ئالیگرێن وێ، بێھتر ژ 30 جاران، ئاڤا وێستگەھا ئەلۆک، ژ سەر حەسەکێ و گوندەوارێن وێ بڕییە. ئەڤ یەک ژی زیانەکا مەزن دگھینە نشتەجیێن وان ناڤچەیان.
