زێدەتری 50 رۆژانە چارەنووسا رۆژنامەڤانەکی کورد نە دیارە

زێدەتری 50 رۆژانە چارەنووسا رۆژنامەڤانەکی کورد نە دیارە

رۆژنامەڤانێ رۆژھلاتێ کوردستانێ مەسعوود کوردپوور زێدەتری 50 رۆژن ژ ئالیێ ھێزێن ئەولەھیا ئیرانێ ڤە ھاتیە گرتن و ھەتا نھا چارەنووسا وی نە دیارە.

ل گۆر زانیاریێن رێخستنا رۆژنامەڤانێن بێسینۆر، ژ دەستپێکا خوەپێشاندانێن ڤان دەمێن داوی یێن ئیرانێ ڤە، ھەتا رۆژا 11ێ مژدارا 2022یێ، 42 رۆژنامەڤان ژ ئالیێ ھێزێن ئەولەھیا ئیرانێ ڤە ھاتنە دەستسەرکرن، 8 رۆژنامەڤان پشتی لێکۆلینێ ھاتن ئازادکرن، لێ بەلێ 34 رۆژنامەڤان ھین ژی دەستەسەرکری نە.

رۆژنامەڤان و رێڤەبەرێ مالپەرا نووچەیان یا موکریان مەسعوود کوردپوور رۆژا 20ێ ئیلۆنا ئیسال و چەند رۆژ پشتی دەستپێکرنا خوەپێشاندانێن شەرمەزارکرنا کوشتنا ژینا ئەمینی، ل باژارێ بۆکانێ یێ رۆژھلاتێ کوردستانێ ژ ئالیێ ھێزێن ئەولەھیا ئیرانێ ڤە ھات دەستەسەرکرن.

پارێزەرێ مالباتا کوردپوور ئەشکەرە کریە کو چ ئاگاھیەکە وان دەربارێ رەوشا مەسعوود کوردپوور دا تونەیە و ناھێلن پارێزەر وی ببینە.

ل گۆر زانیاریێن دەزگەھا مافێن مرۆڤان یا ھەنگاو، ھەری داوی مالباتا کوردپوور ئاگاھدار بوویە کو مەسعوود کوردپوور بۆ گرتیگەھا ئورمیێ ھاتیە ڤەگوھەستن، لێ بەلێ تەڤی کو چەندین جار داخوازا دیتنا وی کرنە، ژ ئالیێ دادگەھ و ھێزێن ئەولەھیێ ڤە رێ ب وان نەھاتیە دایین.

دەزگەھا ھەنگاو ئەشکەرە کریە کو مەسعوود کوردپوور ب “تێکدانا ئاساییشا نەتەوی” ھاتیە تۆمەتبارکرن.

پوستێن ھەمان بەش