هەڤسەرۆکێ بەرێ یێ هه‌ده‌پێ سه‌لاحه‌ددین دەمیرتاش شەڤا بۆری ژ بۆ كو ب باڤێ خوە تاهیر دەمیرتاش یێ كو کریزا دل دەرباس کریە رە هەڤدیتنێ پێک بینە برنە ئامەدێ و پشتی چەند ساعەتان دیسا ڤەگەریا گرتیگەها ئەدرنەیێ.
کۆما پارێزاران یا بۆ پاراستنا ده‌میرتاش راگهاند کو باڤ و داییکا سه‌لاحه‌ددین دەمیرتاش دوهـ ژ نشکاڤە نەخوەش بوونە و بۆ نەخوەشخانەیا پەروەردە و لێکۆلینێ یا گازی یاشارگیلا ئامەدێ هاتن ڤەگوهەستن.
دایکا ده‌میرتاش، سادیە دەمیرتاش پشتی چارەسەریا وێ ئەو بۆ مالێ هاتە شاندن، لێ باڤێ وی تاهیر دەمیرتاش هێژ د بەشا چاڤدێریا گران یا کاردیۆلۆژیێ دە تێ دەرمانکرن.
سه‌لاحه‌ددین دەمیرتاش كو ل گرتیگەها ئەدیرنەیێ گرتییە، دانێ سبەهێ ساعەت 04:00 د بن تەدبیرێن توند یێن ئەولەهیێ دە ئانینە ئامەدێ.
د داخویانیا کۆما پارێزاران یا بۆ پاراستنا ده‌میرتاش دە وها تێ گۆتن: «مووەکیلێ مە برێز دەمیرتاش، ژ بەر نەخوەشیێن داییک و باڤێ وی، شەڤا 12ێ مژدارێ د چارچۆڤەیا یاسایان دە ژ گرتیگەها ئەدیرنەیێ برنە ئامەدێ و پشتی باڤێ خوە دیتیە دیسا برنە گرتیگەها ئەدیرنەیێ».
دەمیرتاش ژ 4ێ مژدارا 2016ان ڤە د چارچۆڤەیا “لێپرسینێن تەرۆرێ” دە ل گرتیگەها ئەدیرنه‌یێ گرتییە.
دادگەها مافێن مرۆڤان یا ئەورۆپایێ د 18ێ جۆتمەها 2018ان دە خوەستبوو دەمیرتاش دەملدەست بێ بەردان و چەند جاران داخوازا خوە دوبارە کر، لێ بەلێ ترکیە ل گۆری وێ بریارێ تەڤنەگەریایە.
