ناڤەندا پاراستنا گەل رادگھینە، ت تێکلیا وان ب تەقینا ل تاخا تاقسیما ستەنبۆلێ تونەیە و سەرساخی ژ خزمێن کەسێن جانێ خوە دانە رە خواست.
فەرمانداریا بریارگەھا ناڤەندا پاراستنا گەل د داخویانیەکە نڤیسکی دە راگھاند “بەریا ھەر تشتی ئەم سەرساخیێ ژ خزمێن کەسێن د تەقینا ل ستەنبۆلێ یا د 13ێ مژدارێ دە ژیانا خوە ژ دەست دانە و ژ برینداران را ژی شفایا خێرێ دخوازن.”
د داخویانیێ دە ھات گۆتن، “گەلێ مە و رایا گشتی یا دەمۆکراتیک دزانە کو چ تێکلیا مە ب ڤێ بوویەرێ ڤە نینە، ئەم سڤیلان ناکن ھەدەف و چالاکیێن ل دژی سڤیلان ژی قەبوول ناکین.”
ئەڤ داخویانیا ناڤەندا پاراستنا گەل پشتی وێ تێ، وەزیرێ ناڤخوەیێ ترکیێ ئیرۆ دەربارێ تەقینا ستەنبۆلێ دە راگھاند، کەسا بۆمبە دانیە ھاتیە دەستەسەرکرن و ئەڤ ئێریش ژ ئالیێ پەکەکێ ڤە ھاتیە کرن.
ھەر وھا سۆیلو گۆت: “ل گۆر نرخاندنا مە فەرمانا ئێریشێ ژ کۆبانیێ ھاتیە دایین و ئێریشکار ژ عەفرینێ دەرباسی ترکیایێ بوویە. “
ژ ئالیێ خوە ڤە، ھێزێن ئەولەھیێ یێن ستەنبۆلێ ژی دا زانین، ناڤێ گومانبارا کو بۆمبە دانیە “ئەحلام ئەلبشرە” یە، ئەو خەلکا سوورییێ یە و تەمەنێ وێ 23 سالن.
دوھی ل کۆلانا ئیستقلا یا باژارێ ستەنبۆلێ تەقینەک روو دا. ل گۆری داوی زانیاریان ژی، د تەقینێ دە، 6 کەس ھاتنە کوشتن و 81 کەس ژی بریندار بوونە.
