ئوردن، عەرەبستانا سعوودی و مسر ئێریشێن ب مووشەک و درۆنان یا کۆمارا ئیسلامی یا ئیرانێ ل سەر ھەرێما کوردستانێ ب توندی شەرمەزار کرن و داخوازا گرتنا تەدبیرێن پێویست ژ بۆ پاراستنا ژیانا وەلاتیان و ئارامیا ھەرێمێ کرن.
وەزارەتا دەرڤە یا ئوردنێ د داخویانیەکێ دە راگھاند، “د بنپێکرنێن دوبارە یێن ئیرانێ ل سەروەری و ئەولەھیا ھەموەلاتیێن وێ دە، ئەم مل ب مل لگەل ئیراقێ نە ژ بۆ گرتنا تەدبیرێن پێویست ژ بۆ پاراستنا ئەولەھی و ئارامیا وێ و سەرساخیێ ل قوربانیان دکن.”
ژ ئالیێ خوە ڤە، وەزارەتا دەرڤە یا سعوودیێ د داخویانیەکێ دە راگھاند، “ئەم ئێریشێن دوبارە یێن ئیرانێ یێن ل سەر قەزایا کۆیێ یا ل رۆژھلاتێ ھەولێرێ شەرمەزار دکن، ئەم ڤان دژمناتیێن کو سەروەری، ئەولەھی و ئارامیا ئیراقێ بنپێ دکە ب توندی رەد دکن.”
وەزارەتا دەرڤە یا عەرەبستانا سعوودی ھەڤخەمیا خوە پێشکێشی حکوومەت و گەلێ ئیراقێ دکە و ھێڤیا باشبوونێ ژ بۆ برینداران دخوازە.
ژ ئالیەکی دن ڤە، وەزارەتا دەرڤە یا مسرێ د داخویانیەکێ دە راگھاند، ئەو ئێرشێن ب مووشەک و درۆنان یێن ژ ئالیێ ئیرانێ ڤە ل سەر چەند دەڤەرێن ھەرێما کوردستانا ئیراقێ ھاتن کرن و د ئەنجامێ دە کوشتی و بریندارێن بێگونەھ ھەنە شەرمەزار دکن. ئەڤ بنپێکرنا ئەشکەرە یا سەروەری و ئەولەھیا ئیراقێ یە.”
دوھی 14ێ مژدارێ بارەگەھێن پارتیا دەمۆکراتا کوردستانا ئیرانێ ل کۆیە و بارەگەھێن کۆمەلەیا زەحمەتکێشان یا کوردستانا ئیرانێ ل گوندێ زرگوێزێ سلێمانیێ راستی ئێریشان ھاتن. ل گۆری زانیاریان ھەتا نھا 2 کەس شەھید بوونە و 8 کەسێن دن ژی بریندار بوونە.
