ئاساییشا پەیەدێ رێ نادە ئەنەکەسە کۆنگرەیێ خوە ل قامیشلۆ چێکە

ئاساییشا پەیەدێ رێ نادە ئەنەکەسە کۆنگرەیێ خوە ل قامیشلۆ چێکە

ئاسایشا پەیەدێ ل باکور و رۆژھلاتێ سووریێ (رۆژئاڤایێ کوردستانێ) رێ نەدان ئەنەکەسە چارەمین کۆنگرەیا خوە ل باژارێ قامشلۆ لدار بخە. ئەندامێ کۆنگرەیا ئەنەکەسێ عەدنان بۆزان گۆت “پەیەدە رێز ل بریارێن کو ئەو دستینن ناگرن.”

ئەنجوومەنا نشتیمانی یا کورد ل سووریێ (ئەنەکەسە) دبێژە، جارەکە دن رێ ل بەر وێ ھاتیە گرتن کو 4ەمین کۆنگرەیا خوە ل باژارێ قامشلۆ یێ رۆژئاڤایێ کوردستانێ ل دار بخە.

بریار بوو ئیرۆ دەمژمێر 10ێ سبەھێ ل ھۆلا زانا یا باژارێ قامشلۆ ئەو کۆنگرە بھاتا ل دارخستن، لێ ل گۆری سەرکردەیێن ئەنەکەسێ ھێزێن ئاسایشێ رێ نەدان ئەندامێن کۆنگرەیێ دەرباسی جھێ کۆنگرێ ببن. ھەتا نھا ئاسایشێ تو داخوانی ل سەر ڤێ یەکێ نەدایە.

ئەندامێ کۆنگرەیێ ئەنەکەسێ نافع عەبدوللا گۆت “4ەمین کۆنگرەیا ئەنەکەسێ دا ل ھۆلا زانا ل قامشلۆ بھاتا لدارخستن، لێ مخابن ئاسایشا سەر ب پەیەدێ ڤە ب سەر کۆنگرەیێ دا گرتن و نەھشتن کۆنگرە پێک وەرە. پشترە مە خوەست ئەم کۆنگرەیا خوە ل ئۆفیسا پەدەکە-سێ یا ل قامشلۆ ساز بکن، لێ دیسا ھێزێن ئاسیشا پەیەدێ ھاتن، گۆتن کو نابە ھوون کۆنگرەیا خوە ساز بکن.”

سەرۆکێ ئەنجوومەنا نشتیمانی یا کورد ل سووریێ سعوود مەلا دبێژە، مۆلەتا ل دارخستنا کۆنگرەیێ ب رێیا شاندیێ ئامەریکا رە ھاتبوو وەرگرتن.

ئەندامەکی دن یێ کۆنگرەیا ئەنەکەسێ دبێژە، پەیەدێ ب رێگرتنێن ل کارێ وان دخوازە ژیانا سیاسی ل رۆژئاڤایێ کوردستانێ تونە بکە و دیار دکە کو ئامەریکا سۆزێن خوە ژ بۆ ئەنەکەسێ پێک نەئانین.

ئەندامێ کۆنگرەیا ئەنەکەسێ عەدنان بۆزان راگھاند “ئەڤ کارێ ھان یێ پەیەدێ ژیانا سیاسی ل سووریێ تنە دکە، لێ ھەروھا ئەنەکەسە و پارتیێن تێ دا دێ ھەر ل سەر خەتا خوە بمینن و بەرەڤانیێ مافێن خەلکێ کورد بکن ب سیاسی. پەیەدە رێزێ ل بریارێن کو ئەو دستینن ناگرن.”

ل داویا سالا 2017ێ دەما کو ئەندامێن 4ەمین کۆنگرەیا ئەنەکەسێ ل ناڤ ھۆلا کۆنگرەیێ بوون، ھێزێن ئاسایشێ ئەو ژ ھۆلێ دەرخستن، و کۆنگرە ھات پاشخستن، وێ دەمێ تەنێ سەرۆکێ ئەنەکەسێ ھات گوھەرتن.

پوستێن ھەمان بەش