نووچەیا «رۆژنیوز»ێ یا کو دگۆت: «په‌ده‌كه ناهێلێت وەشانێن رۆژئاڤا دەرباسی باشوور ببن» ژی درەو دەرکەت
مەدیایا په‌كه‌كێ یا كو ل سلێمانیێ وەشانا خوە دکەت «رۆژنیوز»، ب بەردەوامی نووچەیێن دره‌و ل دژی هەرێما کوردستانێ بەلاڤ دکەت، د نووچەیا هەری داوی یا ڤێ مه‌دیایا په‌كه‌كێ دا هاتبوو نڤیساندن کو رایەدارێن هەرێما کوردستانێ رێ نەدان وەشانێن رۆژئاڤا بەشداری فەستیڤالەکا سلێمانیێ ببن.
د نووچەیا 13ێ ڤێ مه‌هێ یا رۆژنیۆزێ دا هات بەلاڤکرن، «رێڤەبەرێن پارتیا دەمۆکراتا کوردستانێ (په‌ده‌كه) و رێڤەبەریا دەریێ سینۆری یێ پێشابوورێ، دەستوور نەدان «وەشانخانەیا شلێر» بەشداری 4 مین پێشانگەها ناڤدەولەتی یا پرتووکان یا ل سلێمانیێ ببیت، د دەربارێ ڤی بابەتی دا بەرپرسێ دەریێ پێشابوورێ شەوکەت بەربوهاری گۆت: «کەسی داخوازەکا وه‌ها ژ مە نەکری یە».
چاڤکانیێن «دارکامازی» ل سەر ڤێ نووچەیێ لێکۆلین کرن، رێڤەبەرێ دەرگەهێ سێمالکا شەوکەت بەربوهاری دیار کر کو چ داخوازیه‌كا وه‌ها ژ وان نەهاتیە کرن، رێڤەبه‌رێن دەریێ سێمالکا د مژارێن وه‌ها دا نە خوەدی هەلوەستەکێ ب كێفا خوه نه و گۆت: «ئیدیعایێن کو ل مە تێن کرن بوختانن، د ڤی واری دا، پڕ جاران نووچەیێن دره‌و و خاپینۆک دهێنه چێکرن، دڤێت گەلێ مە ب ڤان نووچەیان باوەر نەکەت، ئەم هەر ده‌م دخوازین کو كارێن دەرگەهی ب هێسانی بمەشن».
دارکامازی بەرێ ژی نووچەیێن دره‌و یێن ل سەر دەریێ سێمالکا یێن کو مەدیایا په‌كه‌كێ به‌لاڤ کرین ئیفشا کربوون.
په‌كه‌كە خەتا شنگالێ بکار دئینیت
دارکا مازی ب لێکۆلینا خوە دا زانین کو پێکهاتەیێن گرێدایی په‌كه‌كێ ل سەر خەتا «شنگال، مووسل، مەخموور و کەرکووکێ» شوونا سێمالکا ب کار دئینیت، ئانكو رێیا شنگالێ ب كار دئینیت.
چاڤکانیێن هەرێمی دیار کرن کو په‌كه‌كە ئەڤ دەمەکێ درێژە رێیا «شنگال – رۆژئاڤا» ب کار دئینیت و کادرۆ، رێڤەبەر، چەک، پاره و پێدڤیێن لۆژیستیکی د وێ رێكێ را بۆ ده‌ڤه‌را شنگالێ دابین دكه‌ت، ب دەستوورا تایبەت یا حەشدا شەعبی ژ بۆ دەرباسبوونا کەس و پێدڤیێن په‌كه‌كێ یێن دهێنه شنگالێ دەرباس دبن. ئۆتۆمۆبیلێن په‌كه‌كێ ب کاغه‌زێن دەستوورێ یێن حەشدا شەعبی چوون و هاتنا مووسل و مەخموور و دەڤەرێن دن دکه‌ن، ب راستی ژی پرانیا جاران بێی کو ل مەخموورێ راوەستن راستەراست دچنه کەرکووکێ و دەرباسی سلێمانیێ دبن.
چاڤکانیێن هەرێمی دبێژن، ل خوارنگەهێن سەر خەتا «مووسل – کەرکووک -سلێمانیێ» هەر ده‌م ئۆتۆمۆبیلێن په‌كه‌كێ دهێنه دیتن.
گەلۆ ئەڤ نووچە ژ بۆ ئاستەنگکرنا کۆنگرەیا ئه‌نه‌كه‌سێ هاتە چێکرن؟
رێڤەبەریا رۆژئاڤا یا گرێدایی په‌كه‌كێ په‌یه‌ده و هێزێن سەر ب وێ ڤە نەهشتن ئه‌نه‌كه‌سه کۆنگرەیا خوە ل رۆژئاڤا گرێده‌ت، دو رۆژان بەریا کو کۆنگرە بهێته ئاستەنگکرن، ل دەریێ سینۆری ل ئالیێ رۆژئاڤا بنپێکرنا مافەکێ دن پێک هات.
رێڤەبەریا په‌یه‌دێ یا دەریێ سینۆرێ سێمالکا رێ نەدا ئەنداما مەجلیسا نشتیمانی یا کوردی ل سووریێ (ئه‌نه‌كه‌سێ) ئەسماخان داوود دەرباسی رۆژئاڤایێ کوردستانێ ببیت، رۆژا دووڤ دا ژی ئاساییشا په‌یه‌دێ رێ ل لدارخستنا کۆنگرەیا ئەنه‌که‌سێ گرت.
تێ تەخمینکرن کو په‌كه‌كە ژ بۆ بنپێکرنا مافان و ئاستەنگکرنا کۆنگرەیا ئه‌نه‌كه‌سێ ڤەشێرە ئەڤ نووچەیا دره‌و یا کو دبێژیت په‌ده‌كه رێ نادە “وەشانخانە تەڤلی فەستیڤالێ ببن” چێکری یە.
شێوەیێ په‌كه‌كێ: پاراستنا هەری باش ئێریشە
تشتا کو د شێوازا گشتی یا په‌كه‌كێ دا دەردکەڤیتە پێش ئه‌ڤه‌یه: گاڤا کو ئەو نەحەقە ئێرش دکەته سەر دەور و بەرێن خوە، په‌كه‌كە ل کو دەرا گۆت «نەهەقی ل من تێ کرن» بزانن کو نەحەقی ژ ئالیێ په‌كه‌كێ ڤە تێ کرن. ل جهێ کو په‌كه‌كە هنەکێن دن ب سیخۆریێ سووچدار دکەت، تێ دیتن کو تێکلیێن په‌كه‌كێ ب هێزێن کو بەحسا وان دکەت هەیە.
ئەڤه راستیەکە کو په‌كه‌كە د وارێ مەدیایێ دا خوە باش برێخستن دکەت و ب رێیا راگه‌هاندنێ بێبەختی و فاشیزما خوە ڤەدشێریت، فاشیزم و کۆمپلۆیا مەدیایا په‌كه‌كێ چێدكه‌ت، هەتا نها باش نەهاتییە دیتن و ئیفشا کرن.
