ھەڤسەرۆکێ پەیەدێ سالح موسلم دیار کر کو تەقینا ل تاقسیما ستەنبۆلێ، سەناریۆیا لیستکەکێ ل دژی کوردانە. گۆت ژی: “ت پێوەندیا ھێزێن مە ب ڤێ ئێرشێ ڤە نینە.”
ھەڤسەرۆکێ پارتیا یەکیتیا دەمۆکراتیک (پەیەدێ) سالح موسلم دەربارێ تەقینا ل تاقسیما ستەنبۆلێ دە راگھاند، “ئێرشا تاقسیمێ ژ ئالیێ دایرەیا ھێزێن شەرێ تایبەتێ دەولەتا ترک ڤە ھاتیە ئۆرگانیزەکرن.”
ھەرواھا گۆت: “ئەڤە ئێریشەکا تەرۆریستییە و ئەم ژی وەکە ھەر کەسی ڤێ ئێریشێ شەرمەزار دکن. ئەڤە حیلەیێن عۆسمانیانە؛ لیستکێن ھێزێن شەرێ تایبەت یێ دەولەتا ترکە. ھێزێن ل رۆژئاڤا دکن ئارمانج.”
سالح موسلم دیار کر: “ھێزێن رۆژئاڤا ھەسەدە، رێڤەبەریا خوەسەر و پەیەدێ مە ژ رۆژا دەستپێکێ ڤە گەلەک داخویانیێن ژ بۆ شەرمەزارکرنا ڤێ ئێریشێ دان. چ پێوەندیا ھێزێن مە ب ڤێ ئێرشێ ڤە نینە.”
سالح موسلم دا زانین کو دەولەتا ترک ژ بەر کو پلانێن خوەیێن ل رۆژئاڤا پێک نەئانیە، سەری ل کۆمپلۆیەکا ب ڤی رەنگی دایە و ب تایبەت کۆبانێ کریە ئارمانج و گۆت: “سەناریۆ ئامادە کرنە، دەما دەرفەت ھەبە دێ ئێریش بکن.”
رۆژا 13ێ مژدارێ ل جادەیا ئیستیقلالا تاقسیمێ یا ستەنبۆلێ تەقینەک روو دابوو و تێ دا 6 کەس ھاتن کوشتن و 81 کەسێن دن ژی بریندار بوون.
وەزیرێ ناڤخوەیێ ترکیێ سولەیمان سۆیلو ژی پەکەکە و پەیەدە ب ڤێ تەقینێ تۆمەتبار کربوون و گۆت کو کەسا بۆمبە دانایە جادەیا ئیستیقلالێ ژ کۆبانێ دەرباسی ترکیێ بوویە و گۆت کو ئەو دێ د دەمەکێ نێزیک دا ب گرانی بەرسڤا ڤێ ئێریشێ بدن.”
ژ ئالیەکی دن ڤە وەزیرێ دەرڤە و کۆچبەران یێ سووریێ فەیسەل مقداد ژی ھشیاری دا رایەدارێن ترکیێ کو تەقینا ل ستەنبۆلێ روو دایە، وەک بھانە ب کار نەئینن ژ بۆ گاڤەکێ ل دژی سووریێ باڤێژن.
