د رۆژەکا وەکی ئیرۆ ل سالا 2013ێ دە سەرۆک بارزانی دا کو پشتگریا پێڤاژۆیا ئاشتیێ و چارەسەرکرنا پرسا کوردی بکە، سەردانا دیاربەکرێ کربوو و پەیامێن بەردەوامی و سەرکەتنا پێڤاژۆیێ دابوو.
ئەڤ سەردانا دیرۆکی د دەمەکێ دا چێبووبوو کو پێڤاژۆیا ئاشتیێ نوو دەست پێ کربوو. خەلکێ باکورێ کوردستانێ ب کەلەجانی چاڤەرێیا داویبوونا شەری دکر و سەردانا سەرۆک بارزانی ژی رۆلا وی یا ناڤبەینکاریێ ب زەلالی رادخست بەر چاڤان.
لێ پێڤاژۆ پشتی دانووستاندنێن بێ ئەنجامێن ئالیان د تیرمەھا 2015ێ دە شکەست و شەرێ د ناڤبەرا پەکەکیێ و ئارتەشا ترکیەیێ دە دەستپێکر و ترکیەیێ ژی ب ڤێ ھنجەتێ، شەر ل رۆژئاڤایێ کوردستانێ و ناڤچەیێن سینۆری یێن باشوورێ کوردستانێ بەلاڤ کر. ئارتەشا ترکیەیێ ئەڤ ھەفت مەھن ل زاپێ ژ بەژاھی و ئاسمانی ڤە ئۆپەراسیۆنەکا بەرفرەھ برێڤە دبە.
ل گۆر راگھاندنا وەزارەتا بەرگریێ یا ترکیەیێ د شەرێ زاپێ دە 455 گەریلایێن پەکەکەیێ جانێ خوە ژ دەست دانە، 577 شکەفت و ستارگەھێن وێ رێخستنێ ھاتنە ژناڤبرن و نێزکێ 100 لەشکەرێن ترکیەیێ ژی ھاتنە کوشتن.
باسکێ لەشکەری یێ پەکەکەیێ ھێزێن پاراستنا گەل ھەپەگە ژی ئەشکەرە دکە کو، 2 ھەزار و 554 لەشکەرێن ترکیەیێ ھاتنە کوشتن، ھێزێن وان 11 ھەلیکۆپتەر خستنە خوارێ و دو تانک ژناڤ برنە. ھەپەگە د دەرھەقێ ونداھیێن خوە دە ژی دیار دکە کو، 174 گەریلایێن وان جانێ خوە ژ دەست دانە.
لێ دگەل ڤان ئاماران، ھێڤیا پێڤاژۆیەکا نوویا چارەسەریێ ھێ ژی زندییە. ھەفتەیا بۆری سەردانا شاندەکێ ئاک پارتیێ بۆ فراکسیۆنا ھەدەپەیێ بوو سەدەم کو ئەگەرا دەستپێکرنا پێڤاژۆیا چارەسەریێ جارەکە دن ل رۆژەڤا ترکیەیێ زێدە ببە.
لێ بریاردەرێ دەستپێکرنا پێڤاژۆیەکا نوو د ڤێ سەردەمێ دە ژ بلی سیاسەتمەداران، گرێدایی رازیکرنا بوورۆکراسیا دەولەتا ترکیەیێ و دەروونیا جڤاکا ترکە.
