رێخستنا لێبۆرینێ یا ناڤدەولەتی راگھاند، دەستھلاتدارێن ئیرانێ سزایێ دارڤەکرنێ ژ بۆ بێدەنگکرنا خوەپێشاندەران ب کار تینە.
د داخویانیا خوە دە رێخستنا لێبۆرینێ یا ناڤدەولەتی ئەشکەرە دکە، لگەل زێدەبوونا خوەپێشاندانێن ئیرانێ، دەستھلاتداران ژی سزایێ دارڤەکرنێ زێدە کرنە، ئەڤ ژی بەلگەیەکە زەلالە کو ئەو سزا ژ بۆ بێدەنگکرنا خوەپێشاندەران دهێت بکارئانین.
ھەروھا ژ ئیرانێ داخواز کر، دەملدەست وان سزایێن دارڤەکرنێ بەتال بکە کو ب تۆمەتا خوەپێشاندانێ ب سەر چەند چالاکڤان و خوەپێشاندەران دە ھاتیە سەپاندن.
ژ ئالیەکی دن ڤە، رێخستنا مافێن مرۆڤان یا سەر ب نەتەوەیێن یەکگرتی، داخوازا ھەلوەستا بلەز یا ناڤدەولەتی کر ل ھەمبەر وێ رەفتارا کو حکوومەتا ئیرانێ ل دژی خەلکێ ب کار تینە، کو تەنێ داخوازا مافێن خوە دکن.
خوەپێشاندان و نەرازیبوونێن ئیرانێ پشتی جانژدەستدانا بگومان یا کەچا کورد یا رۆژھلاتێ کوردستانێ ژینا ئەمینی یا رۆژا 17ێ ئیلۆنا ئیسال دەست پێ کر. ل گۆر راپۆرتا رێخستنێن مافێن مرۆڤان، ھەتا نھا ژ بەر خوەپێشاندانان، نێزیکی 325 کەس جانێ خوە ژ دەست دانە.
