دو رۆژێن بۆری دا د خوەپێشاندانێن خەلکێ باژارێ بۆکان یێ رۆژھلاتێ کوردستانێ، د ئەنجاما تەقەیا ھێزێن ئیرانێ دا 6 ھەموەلاتیێن ڤی باژاری یێن ب ناڤێن مستەفا شەعبانی، غەفوور مەولوودی، ھەژار مام خەسرەوی، ھیوا جانجان، ئەمجەد عینایەتی و میلاد مەعرووفی جانێ خوە ژ دەست دان.
د ڤێ دەربارێ دا رێخستنا مافێن مرۆڤان یا ھەنگاو راگەھاند: شەڤا 17.11.2022یێ 5 ھەموەلاتیێن باژارێ بۆکانێ یێن ب ناڤێن مستەفا شەعبانی، غەفوور مەولوودی، ھەژار مام خەسرەوی، ھیوا جانجان و ئەمجەد عینایەتی ب گولـلەیێن ھێزێن ئەولەھیا ئیرانێ ڤە جانێ خوە ژ دەست دان.
ھەرواھا ل گۆر ھەمان رێخستنێ، کەوسەر و کامیل شەعبانی، کو خویشک و برایێن مستەفا شەعبانی نە و رۆژا بەری وێ ل شەقاما سەردار عەزیز خان موکری ل تاخا مەجبوراوا یا باژارێ بۆکانێ ب گولـلەیێن ھێزێن ئیرانێ ھاتبوون کوشتن و شەڤا بۆری ژ ئالیێ ھێزێن ئیرانێ ڤە ھاتنە رەڤاندن. ھێزێن ئیرانێ رێ ب برێڤەبرنا سەرخوەشیێ ل مزگەفت و مالێ نەدایە وێ مالباتێ و رێگری ل ھەر جورە ھاتنووچوونەکا خەلکێ بۆ وێ مالێ دکن.
غەفوور مەولوودی ژی زەوجی یە و بابێ 3 زارۆکان و مەراسیما ڤەشارتنا تەرمێ وی ژی دوھ ل گوندێ ساھۆلان برێڤە چوو.
ژ ئالیێ دن ڤە میلاد مەرووفی ژی تەمەنێ وی 23 سالە و رۆژا پێنجشەمێ ب گولەیێن ھێزێن ئیرانێ ڤە ب گرانی بریندار ببوو، دوھ 18.11.2022یێ ژ بەر گرانیا برینا خوە ژیانا خوە ژ دەست دا.
ل گۆر رێخستنا ھەنگاو خەلکێ خوەپێشاندەر یێ باژارێ بۆکانێ ل ھەمبەر توندیا بێ سینۆر یا ھێزێن ئیرانێ بەرەڤانیا خوە کرنە و دو ئەندامێن سپاھێ پاسدارێن ئیرانێ یێن ب ناڤێن مەھدی ئەسناعەشری و رەحیم سوبحانی ژی ھاتنە کوشتن.
