فەرماندارێ گشتییێ هێزێن سووریەیا دەمۆکراتیک (ههسهدێ) مەزلووم عهبدی رادگهینە، «ئەم هەموو هەولێن خوە ددن کو کارەساتەکە مەزن چێنەبە، لێ ئەگەر شەر دەرکەڤە، هەر کەس دێ باندۆرێ ژ ئەنجامێن وی شەری ببینە».
فرۆکەیێن شەر یێن ترکیێ دەرەنگییا شەڤا بۆری گەلەک دەڤەر ل رۆژاڤا و باشوورێ کوردستانێ بۆمبەباران کرن و وەزارەتا بهرگریێ یا ترکیێ د داخویانیەکێ دە دیار کر، وان ژ بۆ پاراستنا سینۆرێ خوە، دەست ب ئۆپەراسیۆنەکێ ب ناڤێ «پەنچە – شوور» کرنە.
د ڤێ دەربارێ دە فەرماندارێ گشتییێ ههسهدێ مەزلووم عهبدی ل تویتتەرا خوە نڤیسی: «بۆمبەبارانکرنا هەرێمێن مە یێن ئەولە، هەموو ناڤچەیێ دخە مەترسیێ. ئەڤ بۆمبەباران نە د بەرژەوەندیا تو ئالیەکی دە یە».
مەزلووم عهبدی دا زانین: «ئەم هەموو هەولێن خوە ددن کو کارەساتەکە مەزن چێنەبە، لێ ئەگەر شەر دەرکەڤە، هەر کەس دێ باندۆرێ ژ ئەنجامێن وی شەری ببینە. ئێریش دێ نهتەنێ ل هەرێمێن مە یێن کو نها د بن بۆمبەبارانا دژمنان یا هۆڤانە دە نە، بمینن».
هەروهها فەرماندارێ گشتییێ ههسهدێ بانگ ل مالباتان كر کو ل مالێن خوە بمینن و ل گۆری رێنمایێن هێزێن ئەولەهیێ تەڤبگەرن.
ژ ئالیێ خوە ڤە، رەوانگەها سووری یا مافێن مرۆڤان (سۆهر) راگهاند، ئارتێشا ترکیێ 25 جاران ئێریشی چەپەرێن هێزێن سووریا دەمۆکراتیک (ههسهدێ) و ئارتێشا سووریێ ل پارێزگەهێن حەسەکێ، رەقا و حەلەبێ کرنە.
دیار کر ژی، چەپەرێن ههسهدێ ل کۆبانێ، دێرکێ، دەربێسیێ، زرگان و تەلرفعتێ و چەند چەپەرێن ئارتێشا سووریێ ل پارێزگەها حەلەب، حەسەکە و رەقایێ هاتن ئارمانجکرن.
ل گۆری زانیاریێن رەوانگەهێ، د ئەنجاما ڤان ئێریشان دە 6 شەرڤانێن ههسهدێ و 6 لەشکەرێن ئارتێشا سووریێ هاتنە کوشتن و 14 ژی بریندار بوونە.
