فرۆکەیێن شەر یێن ترکیێ پشتی نیڤێ شەڤێ و پشتی شەڤا بۆری ئێریشی هەرێمێن کۆبانی، شاهبا، گرێ سپی، زرگان و دێرکێ کرن، د ئەنجامێ هەژمارەک کەسێن سڤیل، شەرڤانێن هه‌سه‌دێ و هەروه‌ها لەشکەرێن ره‌ژیما سووریێ هاتن کوشتن.
ل گۆر نووچەیێن مەدیایا سەر ب رێڤەبەرییا خوەسەر:
ل دێرکێ
هات راگهاندن، ل گوندێ تەقل بەقلا سەر ب دێرکێ 7 کەس هاتن کوشتن کو د ناڤا وان دە پەیامنێرێ «ئانها» هەیە و 3 کەسێن دن بریندار بوون.
ل زرگانێ
هەروه‌ها ل گوندێ هەرملا یێ باکورێ ناهیا زرگانێ و سایلۆیێن گەنمی یێن گوندێ دەهر ئەل-عەرەب هاتن بۆمبەبارانکرن و د ئەنجامێ دە 3 کەس هاتن کوشتن و 3 کەس بریندار بوون، هەروه‌ها 3 لەشکەرێن ره‌ژیما سووریێ هاتن کوشتن و 5 لەشکەر ژی بریندار بوون.
ل گرێسپی
خالەکە ره‌ژیما سووریێ ل گوندێ قەزەلی یێ سەر ب گرێسپی ڤە، لەشکەرەکی ره‌ژیما سووریێ هات کوشتن و 2 لەشکەرێن دن بریندار بوون.
ل کۆبانێ
رێیا جەرابلوسێ، دارستانا کۆبانێ، تاخا کانیا کوردان، گوندێ هلنجێ و گرێ مشتەنوورێ هاتن بۆمبەبارانکرن و د ئەنجامێ دە پەیامنێرێ «سترێرک تی ڤی» بریندار بوو.
ل هەرێما شەهبایێ
د بۆمبەبارانا ئارتێشا ترکیێ ل سەر گوندێ شەوارخا یێ ناڤچەیا شەرایێ یا عەفرینێ دە، 10 لەشکەرێن حكوومه‌تا شامێ هاتن کوشتن و 5 لەشکەر ژی بریندار بوون.
ل گۆری زانیاریێن رەوانگەها سووری یا مافێن مرۆڤان ژی، د ئەنجاما ئێریشێن ترکیێ دە، 27 کەس هاتنە کوشتن، ژ ناڤا وان: 14 ژ هێزێن سەر ب رێڤەبەریا خوەسەر ڤە، چالاکڤانەکی مەدیاکار و 12 کەس ژ هێزێن رێژیما سووریێ هاتنە کوشتن.
ل گۆر زانیاریێن رەوانگەهێ، 38 کەس ژی د ئێریشێن ترکیێ دە بریندار بوونە و رەوشا هن برینداران گرانە.
