هەسەدە: ئێریشێن ترکیێ بێ بەرسڤ نامینن

هەسەدە: ئێریشێن ترکیێ بێ بەرسڤ نامینن

فەرمانداریا گشتی یا ھێزێن سووریا دەمۆکراتیک (ھەسەدێ) ل سەر ئێریشێن شەڤا بۆری د داخویانەکێ دا راگھاند، “ئارمانجا ڤێ ئێریشێ ھەموو پێکھاتەیێن باکور و رۆژھلاتێ سووریێ و رۆژئاڤایێ کوردستانێ بوو.”

ژ شەڤا دن و ھەتا دانێ سبەھێ دەولەتا ترکیێ ب فرۆکەیێن شەر و فرۆکەیێن بێفرۆکڤان ھەرێمێن جودا یێن رۆژئاڤایێ کوردستانێ و باکورێ سووریێ بۆمبەباران کرن. وەزارەتا بەرەڤانیێ یا ترکیێ 50 فرۆکەیێن ف16 و 20 فرۆکەیێن بێفرۆکەڤان د ئێرشێن خوە دە بکار ئانینە.

د ڤێ دەربارێ دا فەرمانداریا گشتی یا ھێزێن سووریا دەمۆکراتیک (ھەسەدێ) تێکلداری ئێرشان داخویانی دا و راگھاند، “دەولەتا ترک یا داگیرکەر ئەڤە دەمەک درێژ بوو ئامادەکاریێن ئێریشەکا بەرفرەھ ل سەر باکور و رۆژھلاتێ سووریێ و رۆژئاڤایێ کوردستانێ دکر. ب تایبەتی تەقینا کو وان ب خوە ل ستەنبۆلێ ئەنجامدابوو، کرن ھنجەت و گەفێن ئێریشێ ل سەر ھەرێما مە کرن. ل سەر بنگەھێ ڤان ئامادەکاریان د رۆژا 19ێ مژدارێ دا ب شەڤ ل دەمژمێر 12:00ێ ئێریشەکا ھەوایی یا بەرفرەھ و ھۆڤانە پێک ئانین. د ڤێ ئێریشێ دا ھەرێمێن دێرک، دربێسیێ، ئەبوو راسێن، کۆبانی، تل رفعەت و شەھبا ھاتن ھەدەفگرتن. ئێریشێن ھەوایی ھەیا دانێ سبێ بێ ناڤبەر بەردەوام کر.”

ھەسەدێ ئاماژە ب ئەنجامێن ڤان ئێریشان کر و دیار کر، 14 کەسێن سڤیل و شەرڤانێن ھەسەدێ ھاتن کوشتن، ھەر وھا زێدەتری 15 لەشکەرێن رەژیما سووریێ ھاتنە کوشتن.

ھەسەدە د داخویانیا خوە دا دبێژە: “ئەڤ ئێریش نە تەنێ ل ھەمبەر گەلێ کورد ھات کرن. ئارمانجا ڤێ ئێریشێ ھەموو پێکھاتەیێن باکور و رۆژھلاتێ سووریێ و رۆژئاڤایێ کوردستانێ بوو.”

ھەر وھا گۆت: “ئەم وەکە ھێزێن سووریا دەمۆکراتیک (ھەسەدە) ھەتا نھا چاوا کو مە ھەرێم و گەلێ خوە ژ ئێریشێن داعشێ و دەولەتا ترک یا داگیرکەر پاراستن، ژ نھا و شوون دا ژی ئەم دێ ڤێ ئەرکا خوەیا دیرۆکی ب ئیسرار و بریاربوونەک مەزن بەردەوام بکن. ئەڤ کۆمکوژیێن دەولەتا ترک یا داگیرکەر بێ بەرسڤ نامینن. د دەم و جھێن گونجاو دا دێ بەرسڤێن بباندۆر و پێویست هێنە دایین.”

پوستێن ھەمان بەش