فەرماندەھیا ناڤەندی یا ئامەریکایێ “سێنتکۆم” راگھاند، 2 مووشەک ل ناڤەندەکا ھێزێن ھەڤپەیمایا ناڤدەولەتی یا ل دژی داعشێ یا ل پارێزگەھا حەسەکێ یا رۆژئاڤایێ کوردستانێ کەتنە.
سێنتکۆم ئیرۆ شەمفیێ 26ێ مژدارا 2022یێ د داخویانیەکێ دا راگھاند، “شەڤا بۆری د دەمژمێر 22:31 خولەکان دە، 2 مووشەک ل بارەگەھا ھێزێن ھەڤپەیمانیا ناڤدەولەتی یا ل شەدادی یا سووریێ کەتنە.”
ھەروھا ئەشکەرە کر، بارەگەھا کو ھاتیە مووشەکباراکرن بنگەھەکا پەروەردەیێ بوو و د ئێریشێ دا چ زیانەک چێنەبوویە.
فەرماندەھیا ناڤەندی یا ئامەریکایێ (سێنتکۆم) دیار کر، ھێزێن سووریا دەمۆکراتیک (ھەسەدە) گھشتنە جھێ ئاڤێتنا مووشەکان و مووشەکا سێیەما نەتەقیایی دیتنە.
بەردەڤکێ فەرماندارییا ناڤەندییا ئامەریکی جۆ بۆچینۆ ل سەر ئێریشێ ئەشکەرە کر، ئێریشێن ب ڤی رەنگی مەترسیێ دخنە سەر ھێزێن ھەڤپەیمانان و سڤیلان، ھەروھا ئەولەھی و ئارامیا کو ب زەحمەتی ھاتیە بدەستخستن دخە مەترسیێ.
