فەرماندارێ گشتی یێ ھێزێن سووریا دەمۆکراتیک (ھەسەدێ) مەزلووم عەبدی راگھاند، ئامەریکا و ئیران ل دژی ئۆپەراسیۆنا ئارتێشا ترکیێ یا ل سەر رۆژئاڤایێ کوردستانێ نە.
مەزلووم عەبدی ئیرۆ شەمبیێ 26ێ مژدارێ، د کۆنفەرانسەکا رۆژنامەڤانی یا ئۆنلاین دا ل سەر گەفێن ئارتێشا ترکیێ یێن ئێریشکرنا سەر رۆژئاڤایێ کوردستانێ گۆت: “ترکیێ ھێز ل سەر سینۆرێ کۆبانێ جیگر کریە و دخوازە ئێریش بکە.”
عەبدی ل سەر ھەلوەستا جڤاکا ناڤدەلوەتی و ب تایبەتی ژی ھەلوەستا ئامەریکایێ ل ھەمبەر گەفێن ترکیێ گۆت: “ئامەریکا و ئیران ل دژی ئۆپەراسیۆنا ترکیێ نە. نھا ئامەریکا ژ بۆ راوەستاندنا ئۆپەراسیۆنان لگەل ترکیێ د گۆتووبێژان دایە.”
فەرماندارێ گشتی یێ ھەسەدێ مەزلووم عەبدی ل سەر ئەگەرا رێکەفتنا حکوومەتێن شام و ئەنقەرێ ل سەر ئۆپەراسیۆنێ، دیار کر: “باوەر ناکم ھەڤاھەنگی د ناڤبەرا ئارتێشا ترکیێ و سووریێ دا ھەبە. ئەم ھێڤی دکن سووریا بەرسڤ بدە گەفێن ئارتێشا ترکیێ.”
مەزلووم عەبدی، هەر وەها راگهاند، “ئەم دخوازن کێشە ب رێیا گۆتووبێژان وەرن چارەسەرکرن. ھێزێن مە ژ بۆ بەرسڤدانا ئێریشێن ترکیێ ئامادە نە. ئەز باوەرم، ئەگەر ترکیا گەفێن خوە بکە ئێریش، دێ ھەلوەستا ئامەریکایێ توندتر ببە.”
