ئه‌مه‌ریكا ژ بۆ راوەستاندنا ئۆپەراسیۆنا نوو یا ترکیێ ل رۆژئاڤایێ کوردستانێ و باکورێ سووریێ، پێشنیارا ڤەکشاندنا هه‌سه‌دێ ژ هەرێمێن نێزیکی سینۆرێ ترکیێ کری یە.
ئارتێشا ترکیێ ژ رۆژا 20ێ مژدارا 2022ێ ڤە دەست ب ئێریشەکە ئاسمانی ل سەر رۆژئاڤایێ کوردستانێ و باکورێ سووریێ کری یە و دەڤەرێن جودا یێن رۆژئاڤایێ کوردستانێ و چەپەرێن هه‌سه‌دێ و یه‌په‌گێ دکە ئارمانج، سەرۆکۆمارێ ترکیێ رەجەپ تەیپ ئەردۆگان ژی رۆژا چارشەمبا بۆری 23ێ مژدارێ گۆت: «ئۆپەراسیۆنێن مه یێن ب فرۆکە، تۆپ و درۆنان، تەنێ دەستپێکە. ئەمێ ئێریشێن بەژایی ژی بکن».
د ڤێ دەربارێ دا رۆژنامەیا «حوڕیەت» یا ترکی ژ سەر زارێ ژێدەرەکی راگهاند، ئه‌مه‌ریكا ژ بۆ راوەستاندنا ئێریشێن ترکیێ یێن ل باکورێ سووریێ، پێشنیارەک پێشکێشی ترکیێ کری یە.
ل گۆری هاتیە بەلاڤکرن، ئه‌مه‌ریكایێ پێشنیار کریە کو ل هەمبەر هێزێن سووریەیا دەمۆکراتیک (هه‌سه‌ده) 30 کیلۆمەترەیان ژ سینۆرێ ترکیێ دوور بکەڤە، ترکیە ئۆپەراسیۆنا خوە ل سەر رۆژئاڤایێ کوردستانێ و باکورێ سووریێ راوەستینە.
ل گۆری وێ رۆژنامەیێ، بالیۆزێ ئه‌مه‌ریكا ل ئەنقەرێ جێف فلاک ئەڤ پێشنیار د هەڤدیتنا ل گه‌ل وەزیرێ به‌رگریێ یێ ترکیێ هولوسی ئاکار کری یە، بێی کو چ وورده‌كاریێن دن بدە.
هەر د ڤێ دەربارێ دا، فەرماندارێ گشتی یێ هێزێن سووریا دەمۆکراتیک مەزلووم عەبدی دوهی د کۆنفەرانسەکە رۆژنامەڤانی دا دەربارێ هەلوەستا ئه‌مه‌ریكا یا ل هەمبەر گەفێن ترکیێ گۆتبوو: «ئه‌مه‌ریكا و ئیران ل دژی ئۆپەراسیۆنا ترکیێ نە. نها ئه‌مه‌ریكا ژ بۆ راوەستاندنا ئۆپەراسیۆنان ل گەل ترکیێ د گۆتووبێژان دا یە».
ل گۆری هن راپۆرتێن مەدیایی، بەری چەند رۆژان جڤینەک ل فرۆکخانەیا قامشلۆ د ناڤبەرا هێزێن رووسی و بەرپرسێن هه‌سه‌دێ هاتە کرن و ئالیێ رووسی پێشنیار کربوو کو هه‌سه‌ده 30 کم ژ سینۆرێ ب ترکیێ دوور بکەڤە، لێ ئالیێ هه‌سه‌دێ ئەڤ پێشنیار رەد کربوو.
