ناھیت ئەرەن: کوشتنا کو دەولەت نکارە ئەشکەرە بکە تونەیە

سەرۆکێ بارۆیا دیاربەکرێ یێ بەرێ تاھیر ئەلچی کو 7 سال بەرێ ل بەر مینارەیا چارلنگ ھاتبوو کوشتن، ژ ئالیێ بارۆیان، مافپارێزان و نوونەرێن سازیێن سڤیل و پارتیێن سیاسی ڤە ب جەماوەری ھات ببیرئانین. د چالاکیێن ببیرئانینێ دە، بال ھات کشاندن کو تاھیر ئەلچی، ژیانا خوە ژ بۆ تێکۆشینا دادوەریێ کریە و د وێ رێیێ دا ژی ھاتیە کوشتن. بەشداران راگھاندن کو ئەوێ تاھیر ئەلچی و نرخێن کو وی دپاراست ژبیر نەکن و بپارێزن.

سەرۆکێ بەرێ یێ بارۆیا دیاربەکرێ تاھیر ئەلچی ب چالاکیێن جودا تێ ببیرئانین. چالاکیێن ببیرئانینێ، ژ بەر دادگەها دیاربەکرێ  دەستپێ کر و مەشەک ھەتا بەر منارەیا چارلنگا دیاربەکرێ ھات لدار خستن کو تاھیر ئەلچی ل وێ دەرێ ھاتبوو کوشتن.

ل بەر منارەیا چارلنگ مەراسیما ببیرئانینا  تاھیر ئەلچی، ب دەنگێ تاھیر ئەلچی کو ل دژی پۆلیتیکایێن شەر و توندی و زرار دیتنا بەرماییێن دیرۆکی داخویانی دابوو دەستپێ کر.

د مەراسیمێ دا، سەرۆکێ بارۆیا دیاربەکرێ ناھیت ئەرەن بال کشاند کو ھەر چقاس ھەولدانەکە تایبەت ژ بۆ تاریھشتنا کوشتنا تاھیر ئەلچی تێ دایین ژی، ئەو ژی ناھێلن کو ئەڤ جینایەت نھێنی بمینە.

سەرۆکێ بارۆیا دیاربەکرێ ناھیت ئەرەن دیار کر: “جینایەتێن کو دەولەت نکارە رۆنی بکە تونە نە، جینایەتێن کو دەولەت رۆنی ناکن ھەنە. داخوازا تاھیر ئەلچی، ھەقیقەت، دادوەری و ب رێیێن ئاشتیانە چارەسەریا پرسا کورد بوو، ئەم ژی وەک بارۆیا دیاربەکرێ ھەمان نرخان دپارێزن و د ھەمان رێیێ دە تێکۆشین ددن. بلا بێ زانن کو ئەم ناھێلن دۆزا کوشتنا تاھیر ئەلچی ژ رێزێ بێ دیتن و بێ ئەنجام بمینە و ئەم دزانن کو ژ بۆ چارەسەریا وان جینایەتێن کو سەد سالن تێن کرن، دکارە ب ئیرادەیەکە بھێز یا سیاسی چارەسەر ببە. ئەم دێ ھەر تم ب ڤان زانینان داخواز و تێکۆشینا دادوەری و ھەقیقەتێ بەردەوام بدن.”

ھەڤژینا تاھیر ئەلچی تورکان ئەلچی ژی ب گۆتارەکە ھەستیار، بال کشاند ل سەر دادخوازی و ئاشتیخوازیا تاھیر ئەلچی و دا زانین کو ئەو قرنەفیلان د کەڤرێن رەش دچنن و ھەر رۆژ ھەژمارا کەسێن کو دۆز و داخوازا دادوەریێ دکن زێدە دبن و ل نرخێن تاھیر ئەلچی خوەدی دەردکەڤن.

٧ سال د سەر کوشتنا تاھیر ئەلچی رە دەرباس بوون. ب گۆتنا ھەڤال و ھەڤرێیێن وی قاسدێ ئاشتییێ ل بەر منارەیا چارلنگ ھاتبوو کوشتن. ھەڤال و ھۆگرێن وی و نوونەرێن سازیێن سڤیل و پارتیێن سیاسی ئیرۆ ل سەر گۆرا وی ژێ رە گۆتن: ئەم ھەتا کو داخوازێن مە بێن جێبەجێ کرن تێکۆشینا خوە دێ بەردەوام کین.