بریکارێ وەزارەتا پێشمەرگە سەربەست لەزگین رادگھینە، ھەرێما کوردستانێ نابتە ھێزەکا تەماشەڤان، ئەگەر ھەر ھەولەک ژ بۆ داگیرکرنا وێ بێ دایین.
سەربەست لەزگین بەشداری بەرنامەیا باسی رۆژ یا کوردستان24ێ بوو و ل سەر کۆنترۆلا سینۆرێ ب وەلاتێن جیران رە راگھاند، سینۆرێ ھەرێما کوردستانێ ب ئیرانێ رە 600 کیلۆمەترۆ و ب ترکیێ رە ژی زێدەتری 300 کیلۆمەترۆ یە، ژ بەر دژواریا ھندەک دەڤەرێن سینۆری و ھەبوونا چەکدارێن پەکەکێ، حکوومەتا ھەرێما کوردستانێ نەگھیشتیە خالا سفر یا سینۆرێن ب وان ھەر دو وەلاتان.
دەربارێ ئێریشێن ئیرانێ ل سەر بارەگەھێن پارتیێن رۆژھلاتێ کوردستانێ ل ناڤا ھەرێما کوردستانێ دە، سەربەست لەزگین گۆت: ھەر چەند بارەگەھێن پژاکێ کو بەشەک ژ پەکەکێ یە ل سەر سینۆرێ ئیرانێ ھەنە ژی، لێ ژ ئالیێ ئیرانێ ڤە نەھاتنە بۆمبەبارانکرن.
سەربەست لەزگین تەکەز کر کو ھەڤاھەنگیەکا تەمام د ناڤبەرا سوپایێ پاسدارێن ئیران و پژاکێ دە ھەیە.
دەستنیشان کر ژی، تۆمەتبارکرنێن ئیرانێ کو ھەرێما کوردستانێ وەکە مەترسی ل سەر ئاسایشا خوە یا ناڤخوە نیشان ددە، بێبنگەھن. تەکەز کر ژی، سیاسەتا حکوومەتا ھەرێما کوردستانێ دیارە، ئەو دخوازە ببە فاکتۆرا ئاشتی و ئارامیێ ل ناڤچەیێ و ب دیالۆگێ پرسگرێکان چارەسەر بکە.
بریکارێ وەزارەتا پێشمەرگە ئەشکەرە کر، حکوومەتا ھەرێما کوردستانێ دێ بەردەوام بە ل سەر ئالیکاریێن مرۆڤی ژ بۆ کۆچبەرێن رۆژھلاتێ کوردستانێ. د ھەمان دەمێ دە ژی، دەستوور نایێ دایین کو ژ ناڤا ھەرێما کوردستانێ ڤە ل دژی وەلاتێن جیران چالاکیێن چەکداری وەرن کرن.
گۆت ژی: ھەرێما کوردستانێ نابتە ھێزەکا تەماشەڤان، ئەگەر ھەر ھەولەک ژ بۆ داگیرکرنا وێ بێ دایین و ئەم دێ ب ھەموو کارینێن خوە بەرەڤانیێ ل خاکا ھەرێما کوردستانێ بکن.
دەربارێ رۆلا حکوومەتا ئیراقێ د پاراستنا سینۆران دە ژی، سەربەست لازگین گۆت، حکوومەتا ئیراقێ نەکاریە ئەولەھیا ل سەر ناڤچەیێن سینۆری کۆنترۆل بکە کو دەستێوەردانا دەرڤەیی ژی رۆلەک وێ ھەیە، لگەل وێ ژی رێگری ھەبوو ژ بۆ کۆنترۆلکرنا ئەولەھی و لەشکەری ل ناڤچەیێن سینۆری و ب تایبەتی ل شنگالێ.
سەربەست لەزگین ئاماژە ب وێ کر، نەبوونا سیستەمێن بەرەڤانیا ئاسمانی ل ئیراقێ، بوویە سەدەم کو ئاسمانێ ئیراقێ د دەستێ ئالیێن دن دە بە، لێ نھا ھەولەک ھەیە کو سیستەما بەرەڤانیا ئاسمانی ژ بۆ ئیراقێ و ھەرێما کوردستانێ ژی د ناڤ دە بهێتە دابینکرن.
