ئەنجوومەنا نشتیمانی یا کوردی ل سووریێ (ئەنەکەسێ)، پشتی کۆنگرەیا خوە یا 4ەمین ئەنجامدای، داخویانیەک ژ بۆ رایا گشتی راگھاندن. ئەنەکەسێ د 14ێ مژدارێ دا ھەولدان کۆنگرەیا خوە چێبکن، لێ چەکدارێن پەیەدێ کەتن جھێ کۆنگرەیێ و ئەندامێن کۆنگرەیێ دەرێخستن دەرڤە و نەھشتن ئەو کۆنگرەیا خوە ئەنجام بدەن.
لێ پشترا ب ئاوایەک دن کۆنگرەیا خوە ئەنجامدا و رۆژا 29ێ مژدارێ داخویانیەک ب مناسەبەتا پێکئانینا کۆنگرەیێ راگھاندن.
ئەنەکەسە د داخویانیێ دا دبێژە:
“پشتی چەکدارێن پەیەدێ رۆژا 14ێ مژدارێ نەھشتن کۆنگرەیا مە یا 4ەمین ل ھۆلا دەستنیشانکری بهێت ئەنجامدان، مە رۆژا 28ێ مژدارێ کۆنگرەیا خوە د بن ناڤێ (ژ بۆ سووریایەکا پرئالی، دەمۆکرات و ھەڤگرتی کو دەستوورا وێ مافێن نەتەوەیی یێن کوردان ل سووریێ و ھەموو پێکھاتەیێن دن ناس بکە) دا و ب رێیا چەند جڤینێن کۆنگرە ئەنجامدا.”
ئەنەکەسێ د داخویانیا خوە دا، قەدەغەکرنا ئەنجامدانا کۆنگرەیێ ل باژارێ قامشلۆ ژ ئالیێ ھێزێن ئاسایشێ ڤە شەرمەزار کر و تەکەزی ل سەر یەکرێزیا ناڤمالا کوردی کر.
ئەنەکەسێ دیار کر، د جڤینێن کۆنگرەیێ دا راپۆرتا سیاسی، بەرنامەیا سیاسی و سیستەما بنگەھین ھاتن گۆتووبێژکرن، ژ بۆ کو لگەل قۆناغ، پێشکەتن و پێشھاتێن کریزا سووریێ دا بوون، بگونجیت.
ئەنەکەسێ ئاماژە ب وێ یەکێ کر، د جڤینێن کۆنگرەیێ دا ھەژمارەکا بریار و راسپەردەیان ھاتن دان، ژ وان:
– بەشداران رێگرتنا ل ئەنجامدانا کۆنگرەیێ ل سالۆنا دەستنیشانکری و ل جھێ ئالتەرناتیف، ژ ئالیێ چەکدارێن پەیەدێ ڤە شەرمەزار کرن.
– حکوومەتا سووریێ د بەر بەردەوامیا کریز و ئێش و ئازارا گەلێ سووریێ دا بەرپرسە. د ڤی واری دا، کۆنگرەیێ بانگ ل جڤاکا ناڤدەولەتی و وەلاتێن پێوەندیدار کر کو ب ئەرکێ خوە رابن، رێیا چارەسەریا سیاسی ئاکتیڤ بکن و فشارێ ل رێژیما سووریێ بکن، تا کو بریارێن ناڤدەولەتی و د سەری دا بریارا 2254 جێبەجێ بکە.
– کۆنگرەیێ تەکەزی ل سەر، گرنگیا پابەندبوونا ئۆپۆزسیۆنا سووریێ ب بژاردەیا سیاسی، دانووستاندنان، یەکرێزیا ئۆپۆزسیۆنێ و پابەندبوونا وێ ب ناڤەرۆکا داخویانیا ریاز 2، ب تایبەت خالێن کو ب دۆزا کوردی ڤە گرێدایییە، وەکە پرسەکا نشتمانی و دەستووری و ناسکرنا مافێن نەتەوی یێن گەلێ کورد ل سووریێ، کر.
– ئەنەکەسێ ھەموو جورەیێن بنپێکرن و تاوانێن کۆمێن چەکدارێن سەر ب ترکیێ ڤە و یێن گرێدایی ئیتیلافێ ل عەفرین، سەرێ کانیێ و گرێ سپی و گوھەرتنا دەمۆگرافی ل وان باژاران و ھەموو ئەردنیگاریا سووریێ، شەرمەزار کر.
– ئەنەکەسێ دەرباسبوونا ھەیئەت تەحریر ئەل-شام (ئەنیا ئەل-نوسرە) یا کو وەکە رێخستنەکا تەرۆریست دهێت بناڤکرن، بۆ عەفرینێ شەرمەزار کر و بانگ ژ بۆ دەرخستنا وێ و ھەموو کۆمێن چەکدار ژ باژێری کر.
– ئەنەکەسێ بانگ ل جڤاکا ناڤدەولەتی کر کو ڤەگەرەکە ئەولە یا کۆچبەران بۆ مالێن خوە مسۆگەر بکە، رێڤەبەریا ھەرێمێ رادەستی خەلکێ وێ یێن رەسەن بکە و پاراستنا ئەولەکاریێ ژ بۆ وان پەیدا بکە.
–ئەنەکەسێ دەستھلاتا تاکرەوی یا پەیەدێ ل ھەرێمێ شەرمەزار کر.
– ئەنەکەسێ بانگ ل ھەڤپەیمانیا ناڤدەولەتی کر رێ ل بەر گەفێن ترکیا دەربارێ ئۆپەراسیۆنێن لەشکەری بگرە و ھەر وھا داخواز ژ پەکەکێ کر کو خاکا رۆژئاڤا و باشوورێ کوردستانێ ژ بۆ شەرێ خوەیێ لگەل ترکیێ دا بکار نەیینە.
– ئەنەکەسێ بال کشاند سەر گرینگیا پێشخستنا چاندا پێکڤەژیانێ و خورتکرنا تێکلیێن د ناڤبەرا ھەموو پێکھاتەیان دا.
– ئەنەکەسێ تەکەزی ل سەر یەکرێزیا ناڤمالا کوردی کر، ژ بۆ خورتکرنا رۆلا ئەنجوومەنێ د وارێ نەتەوەیی و نشتمانی دا و رۆلا کوردان د پرۆسەیا سیاسی و پاشەرۆژا سووریێ دا و بانگ ل ھەسەدێ و ئالیێ ئامەریکی کر کو بەردەوامیێ بدن دانووستاندنێن کوردی.
