ئارژین زارۆكه‌كه كورده، خه‌ون و هێڤیێن وێ یێن مه‌زن هه‌بوون، لێ قه‌ده‌را ره‌ش «په‌كه‌كێ» نه‌هشت ئه‌و ب هێڤیێن خوه شاد ببه، په‌كه‌كێ ئه‌و ره‌ڤاند و به‌رێ وێ دان مرنێ، مرنا وێ ڤه‌شارتی هشت و پاش ده‌رباسبوونا 6 سالان ژ نوو ڤه هاتییه و ب بێ ئه‌خلاقی دبێژه: «خه‌ون و هێڤیێن ئارژینێ تونه‌بوون، ته‌كانه هێڤی و قیبله‌تا ئارژینێ ئاپۆ بوو، ئه‌و رۆژه‌كا ب ته‌نێ ژی ژ وێ قیبله‌تێ ده‌رنه‌كه‌ت»!.
رێخستنا په‌كه‌كێ، ژ ده‌ستپێكا دامه‌زراندنا خوه و ژ بۆی چێكرنا شه‌رڤانان پشت به‌ستن ل سه‌ر ره‌ڤاندنا زارۆكێن كوردان ژ هه‌ر چار په‌رچه‌یێن كوردستانێ كری یه، ب هه‌زاران زارۆك ره‌ڤاندنه، دانه كوشتن و مرنا وان هه‌یا رۆژا مه یا ئیرۆ ڤه‌شارتی هشتی یه.
«نێرگز ئاكشین» زارۆكه‌كه كورده، ئه‌و ل مێرسینێ ژ دایكببوو، په‌كه‌كێ ئه‌و ل سالا 2014ێ ره‌ڤاند و برن چیا و ل ور مه‌ژیكێ وێ شووشت و ناڤێ وێ گوهه‌راند كرن ئارژین، ئارژین وه‌كه د وێنه‌ی ده دیار هێژان د ته‌مه‌نا زارۆكتیێ ده یه، ئه‌و ل سالا 2017ان ل هه‌رێما به‌ستایێ یا شرنه‌خێ ب ده‌ستێ ئارتێشا ده‌وله‌تا ترك تێ كوشتن.
په‌كه‌كێ ئیرۆ رۆژا شه‌می 3/12/2022 و پاش ده‌رباسبوونا نێزی 6 سالان ژ نوو ڤه هاتییه و مرنا ئارژینێ ئیلان كری یه، د په‌سنێ وێ ده ژی پڕ ب بێ ئه‌خلاقی دبێژه: «قیبله‌تا ئارژینێ رێبه‌رتی بوو، ئارژین رۆژه‌كا ب ته‌نێ ژی ژ وێ قیبله‌تێ ده‌رنه‌كه‌ت».
په‌كه‌كه كو بوویه قه‌ده‌را ره‌ش بۆ زارۆكێن كوردان، ب هه‌زاران زارۆك ژ ده‌ریێن مالێن وان، ژ رییا دبستانان ره‌ڤاندنه، ب دارێ زۆرێ ژ دای و باڤێن وان سته‌ندنه و به‌رێ وان دایه مرنێ، په‌كه‌كه زارۆكێن كوردان وه‌كه سۆته‌مه‌نییا شه‌رێ خوه یێ ساخته ب كار تینه، وان د ره‌ڤینه و د كوژه و د نه‌رینا ڤێ رێخستنێ ده، هه‌یا كو ئه‌ڤ زارۆك خوه ژ بۆی ئاپۆ نه‌دن كوشتن، لاییقی وی ده‌رناكه‌ڤن!!.
