فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی پێشوازی ل ھەلوەستێن ناڤدەولەتی یێن رەدکرنا ئۆپەراسیۆنا ترکیێ ل سەر رۆژئاڤایێ کوردستانێ و باکورێ سووریێ کر و د ھەمان دەمێ دا داخوازا ئاڤێتنا گاڤێن پراکتیک ژ بۆ بداویکرنا ئێریشێن ئارتێشا ترکیێ کر.
فەرماندارێ گشتی یێ ھەسەدێ مەزلووم عەبدی ل ھەژمارا خوەیا تۆرا جڤاکی “تویتەر”ێ پێشوازیێ ل ھەلوەستێن ئەنجوومەنا ئاسایشا ناڤدەولەتی کر کو ئۆپەراسیۆنا ترکیەیێ رەد دکن و گۆت: “ئەم شانازیێ ب ھەڤکاریا خوەیا ناڤدەولەتی یا ژ بۆ بھێزکرنا ئارامیێ ل ھەرێمێن باکور و رۆژھلاتێ سووریێ دکن.”
عەبدی گۆت ژی: “ئەم ھێڤی دکن کو ئەڤ ھەلوەست ببن گاڤێن پراکتیک ژ بۆ بداویکرنا ئێریشێن ئارتێشا ترکیێ و دیتنا چارەسەریەکا سیاسی یا دادوەرانە ژ بۆ کریزا سووریێ و پرسگرێکا کورد.”
ترکیا ژ 20ێ مژدارا 2022یێ ڤە ب رێیا فرۆکەیێن شەر، درۆن و تۆپخانەیێ دەست ب ئۆپەراسیۆنەکە ل سەر ناڤچەیێن جوداێن رۆژئاڤایێ کوردستانێ و ناڤەچەیێن د بن کۆنترۆلا ھەسەدێ دە کریە و گەفا دەستپێکرنا ئێریشەکا بەژاھی ژی دخوە.
