ھەڤسەرۆکێ بەرێ یێ ھەدەپێ سەلاحەدین دەمیرتاش ژ گرتیگەھا ئەدرنەیێ، داخوزا ھەڤدیتنەکێ ژ عەڤدللا ئۆجالان کر. دەمیرتاش ب ڤێ مەبەستێ سەری ل وەزەرەتا دادێ دا کو رێکێ بدەنێ دا بچیت ئیمرالیێ و هەڤدیتنێ لگەل ئۆجالان دا بکە. لێ ھەتا نھا چ بەرسڤەک ب دەمیرتاش نەھاتیە دان و دبیت بەرسڤا وی ژی نەهێت دایین.
لێ ئالیێن سیاسی ڤێ مژارێ ب ئاوایێن جودا دەنرخینن. ژ بەر ڤێ یەکێ، داخوازا دەمیرتاش کو نە موومکنە ئەنجامێن ئەرێنی دەرخە ب چ واتەیێ دهێت؟ گەلۆ ئەڤ دەستپێشخەری تەڤگەرەکا نوویا “پێڤاژۆیا چارەسەریێ”یە؟ ئەڤ پرس دهێت کرن و بەرسڤا ڤێ ژی تەنێ دەستھلاتا ھەیی و ئەردۆگان دکارە بدە. لێ ئالیێن چەپێن ھەڤکارێن ھەدەپێ ڤێ یەکێ گەلەک ب حەساسی دنرخینن و ترسا وانا ھەری مەزن ئەوە کو، ئۆجالان بەر ب دەستھلاتێ ڤە بچیت و باندۆرەکێ ل دەنگێن ھەدەپێ بکە. وی دەمی ھەموو پلانێن وان یێن ژ بۆ ھلبژارتنا دێ تێک چن.
ژ بەری نھا دو مەھان ژی دەمرتاش ب رێیا ھەدەپێ داخوازا ھەڤدیتنەکێ ل ئۆجالان کربوو. دەمیرتاش ئەڤ داخوازیا خوە ژ بەرپرسێن ھەدەپێ رە گۆتیبوو. لێ تێ ئیدیعا کرن کو ھەدەپێ ئەڤ یەک د جھ دا نەدتیبوو.
دەمیرتاش ئێڤارا چارشەمبێ د داخویانیا کو ژ «ھالک تیڤی» رە شاندبوو دە، دابوو خویاکرن کو دەما ژ بۆ ھەڤدیتنێ سەرلێدان کربوو، بال کشاندبوو سەر وێ یەکێ کو ‘تشتەکی ھەری بچووک یان ژی ئاگاھیا کو دێ پێڤاژۆیەکا نوو یا چارەسەریێ دەست پێ بکە تونەیە.
ھەرکەسەک ل گۆرا خوە ڤێ ھەلوەستا دەمیرتاش دنرخینە، لێ ژ شۆیەک سیاسی زێدەتر تشتەک دی نینە.
