خولەکا راهێنانێ یا ل سەر چەکێن گران يا ئەفسەرێن هێزێن پشتەڤانیا یەک يا وەزارەتا پێشمەرگە یا هەرێما کوردستانێ، ل بن سەرپەرشتیا هێزێن هەڤپەیمانان ب داوی هات.
ئيرۆ سێشەمبێ 6ێ کانوونا 2022ێ، ب ئامادەبوونا فەرماندارێ فەرمانداریا هێزێن پشتەڤانیا یەک سیهاد بارزانی، جیگرێ سوپاسالار بۆ ئیدارە و میرە هۆشمەند حەیدەر، بەرپرسێ تیما شێورمەند یا هەڤپەیمانان یا ل هەرێما کوردستانێ، فەرماندارێ هێزێن ئالمانیایێ ل هەرێما کوردستانێ و ئەفسەرێن پایەبلندێن وەزارەتا پێشمەرگە و فەرمادارێن سەربازی یێن هێزێن پێشمەرگەیێ کوردستانێ، مەراسیما بداویهاتنا خولا چارەم یا بنگەهین یا فەرمانداریا هێزێن پشتەڤانیا یەک برێڤە چوو.
د دەستپێکا مەراسیمێ دە فەرماندارێ فەرمانداریا هێزێن پشتەڤانیا یەک سیهاد بارزانی رۆناهی خستە سەر گرینگیا خولێن ب ڤی رەنگی یێن ل سەر بلندکرنا شیانا هێزێن پێشمەرگە کو دبە سەدەمەکە بهێز ژ بۆ پشتەڤانیکرنا هێزێن پیادە یێن ل بەرەیێن شەر، هەروها سپاسیا هەڤپەیمانان کر ژ بۆ ئالیکاریکرنا هێزێن پێشمەرگەیێ کوردستانێ.
پشترە ئامادەبوویێن مەراسیمێ سەردانا “قادا ئاڤێتنێ” کرن ژ بۆ تەماشەکرنا نماییشەکە سەربازی کو ژ ئالیێ ئەفسەرێن بەشداربوویێن خولا ل سەر چەکێن گران، هات ئەنجامدان.
د ڤێ خولێ دە 28 ئەفسەرێن پێشکەتی یێن فەرمانداریا هێزێن پشتەڤانیا یەک بۆ دەما سێ مەهان ب ئاوایەکی سفت، راهێنان ل سەر چەکێن گران کرن.
فەرمانداریا هێزێن پشتەڤانیا یەک سەر ب وەزارەتا پێشمەرگە یا هەرێما کوردستانێ یە و ئەرکێ پشتەڤانیا هێزێن پیادە یێن هێزێن پێشمەرگە ل سەر ستوویێ وانە، د دەما بۆری دە ژی رۆلا وان یا گرینگ هەبوو د بەرەیێن شەرێن دژی داعشێ دە.
