رێخستنا په‌كه‌كێ وه‌كه هه‌ر رۆژ دوهـ ژی، ناسنامه‌یا 5 جوانێن كورد ئه‌شكه‌ره كر كو دو سالان به‌رێ دانه كوشتن و ژ نوو ڤه مرنا وان ئیفشا كر، په‌كه‌كێ ڤێ جارێ نه ته‌نێ مرنا وان ڤه‌شارتی هشتبوو، لێبه‌لێ ئیرۆ هاتيیه ب رووقایمی ب زمانێ ڤان جوانێن به‌له‌نگاز یێن مری گۆتی یه: «ئه‌م بوون ملیتانێن میناك یێن ئاپۆ»!!
هه‌په‌گێ باسكێ له‌شكه‌ری یێ په‌كه‌كێ، ناسنامه‌یا 5 چه‌كدارێن خوه ئه‌شكه‌ره كر كو ل 24 ئیلۆنا سالا 2020ێ ل سینۆرێ پارێزگه‌ها وانێ یا باكورێ كوردستانێ، كه‌تنه به‌ر ئێریشێن ده‌وله‌تا ترك و ژیانا خوه ژ ده‌ست دا نه، پاش ده‌رباسبوونا دو سال و مه‌هه‌كێ ژ نوو ڤه هاتییه و مرنا وان ئیفشا كری یه.
ناڤێ وان وسانه:
ده‌لال عه‌لی – ژ كۆبانێ.
حه‌مید تریاكی – ژ ئێله‌هێ.
شه‌رڤان مامۆ – ژ عه‌فرینێ.
ره‌شید ئۆرووك – ژ وانێ.
ئەسخەر قۆردۆیمیلان – ژ ماكو.
هه‌په‌گێ د په‌سنێ ڤان جوانان ده گۆتییه: «ئه‌و ملیتانێن هێژا یێن ئاپۆ بوون، ئه‌و فه‌دایێن ئاپۆ بوون، وان ژ زارۆكتیا خوه ئاپۆ و فه‌لسه‌فا ئاپۆ ناسكربوو»، هه‌ر وها پاش ده‌رباسبوونا 2 سالان ل سه‌ر جان ژ ده‌ست دانا وان، دوهـ ب ناڤێ وان و زمانێ وان گۆتیه: «ئه‌م بوون ملیتانێن میناك یێن ئاپۆ»! هه‌ر وه‌كه كورد زارۆكێن خوه خوه‌دی دكن داكو وان فه‌دایێ زلامێ ئیمرالیێ بكن.
په‌كه‌كه هه‌ر رۆژ وێنه‌یێن كۆمێن زارۆك و جوانێن كوردان د مه‌دیایا خوه ده پارڤه‌دكه، ئه‌و جوانێن كو د به‌رخوه‌دانا خوه یا ساخته ده به‌رێ وان دده مرنێ، په‌كه‌كه زارۆكێن كوردان د ره‌ڤینه و ب ده‌ستێ ئارتێشا ده‌وله‌تا داگیركه‌ر دده كوشتن و پشتره تێ و دبێژه: «ئه‌و لایقی ئاپۆ ده‌ركه‌تن»!.
زارۆكێن كوردان ژ بۆی په‌كه‌كێ سۆته‌مه‌نییا شه‌ر ن، په‌كه‌كه هه‌ر رۆژ وان دده كوشتن و پشتره پروباگاندایێ ب وان دكه، به‌رژه‌وه‌ندیێن رێخستنێ ب وان د قه‌دینه، وان د رییه‌كێ ده فه‌دا دكه كو تو پێوه‌ندییا وێ ب كورد و كوردستانێ ڤه تونه.
