دوران كالكان یێ رێڤه‌به‌رێ په‌كه‌كێ، د داخۆیانییا خوه یا هه‌ری داویێ ده ڤه‌كری گۆت كو په‌كه‌كه دێ خه‌تا زاپێ و ئاڤاشینێ ژ ده‌وله‌تا تركیێ ره چۆل بكه.
دوران كالكان ئەندامێ دەستەیا رێڤەبر یا په‌كه‌كێ، ژ تێلەفیزیۆنا پارتیا خوە مه‌دیا هه‌به‌ر ئاخڤی و نرخاندنا رۆژه‌ڤێ، ئێریشێن ده‌وله‌تا تركیێ یێن ل سه‌ر رۆژئاڤا و باشوورێ كوردستانێ كر و گۆت: «ل پێشیا وان شەرەکی دژوار هەیە، نە دیارە ترکیە ل دژی رۆژئاڤایێ کوردستانێ ئۆپەراسیۆنێ بکە یان نا؟ لێ ئەگەر ئۆپەراسیۆنەکە نوو بکە، ئەوێ ل دژی خەتا زاپ و ئاڤاشینێ بە».
گه‌لۆ ئه‌ڤ گۆتنا كالكان دهێته چ واته‌یێ؟
په‌كه‌كه د 10 سالێن رابووری ده یه‌كه‌م جار ب ئاوایه‌ك ڤه‌شارتی ل بن ناڤێ به‌رخوه‌دانێ هێدی هێدی ناڤچه‌یێن باشوورێ كوردستانێ ژ ئارتێشا تركیێ ره چۆل كرن، پشتره و تایبه‌ت ل 3 سالێن داویێ ئه‌شكه‌ره ده‌ڤه‌رێن ستراته‌جیك یێن كو 30 سالان د ده‌ستێ وان ده بوون، ژ بۆی تركیێ هشتن شه‌رێ ده‌مه‌كی ل خه‌تا سینۆر دهات دیتن، ئیرۆ گهایه ناڤا گوندێن باشوور و دۆربه‌را باژارۆكان.
دوران كالكان ژی ئیرۆ هاتییه و دبێژه: «ل پێشیا مه پێڤاژۆیه‌ك هه‌یه، هه‌گه‌ر تركیه ئۆپه‌راسیۆنێ پێك بینه وێ ل دژی خه‌تا زاپێ و ئاڤاشینێ به»، ئه‌ڤ گۆتن ژی دهێته وێ واته‌یێ كو په‌كه‌كه هه‌موو ئاماده‌هی كرنه زاپێ و ئاڤاشینێ هنه‌ك شه‌رێن و په‌ڤچوونێن ساخته لێ ئه‌نجام بده و پشتره وان ناڤچه‌یان ژ تركیێ ره ڤالا بكه، وه‌كه چاوا د دو سالێن رابووری هه‌رێمێن زنارا كێسته، ده‌هان گوندێن به‌رواری بالا، بلنداهیێن خامتیری، به‌رێ ژی چیایێ شه‌كیف و خاكورك و به‌ریا چه‌ند مه‌هان ژی كوره‌ژار ژ تركیێ ره هشتین.
رێخستنا په‌كه‌كێ پێشی كو هه‌ر ناڤچه‌یه‌كه كوردستانێ راده‌ستی تركیێ بكه، ئاماده‌هیێ و زه‌مینه‌سازیێ ژ بۆی ڤێ راده‌ستكرنێ چێدكه، ئه‌ول ئه‌ندامێن كۆنسه‌یا برێڤه‌به‌ر یێن رێخستنێ وه‌كه كارایلان، كالكان، كاراسۆ و یێن دن ل مه‌دیایێ ده‌ردكه‌ڤن و نرخاندنێ و شیرۆڤه‌یێن عه‌سكه‌ری دكن، دبێژن ل پێشیا مه ئه‌و قاس خه‌ته‌ری هه‌یه، پشتره ده‌ما ترك ئێریشێ دكه دیسا ل مه‌دیایێ ده‌ردكه‌ڤن و دبێژن ئه‌م به‌رخوه‌دانێ سلاڤ دكن، شه‌رێ مان و نه‌مانێ یێ ل زاپێ تێ كرن، لێ پشتر و د ناڤا 3 رۆژان ده ئه‌و هه‌رێما شه‌ر ژ بۆی تركیێ تێ چۆل كرن و په‌كه‌كه ب یێك جاری ل ور وه‌ندا دبه، ب كورتاسی شه‌ره‌كی ساخته، فه‌داكرنا ده‌هان زارۆكێن كوردان و پشتره بازدان، په‌كه‌كه ڤێ دكه، ژ بۆ كو پشتر ببێژه من شه‌ر كر، من به‌ردێل دان، لێ یا راست تفاقا ڤالاكرنا وان هه‌رێمان به‌ریا ئێریشێ ل نێڤبه‌را تركیێ و په‌كه‌كێ هاتیه نیقاش كرن و بریار ل سه‌ر هاتیه گرتن.
بەرێ ترکیێ ژ رۆژئاڤایێ کوردستانێ زێدەتر، ل باشوورێ کوردستانێ یە
کالکان بۆ مه‌دیا هابه‌رێ دبێژە: «د پێڤاژۆیا پێشیا مە دە، شەرەکی دژوار دێ روو بدە. گەلۆ ئەڤ شەر دێ ل رۆژئاڤایێ کوردستانێ ژی بەلاڤ ببە یان نا؟ بریارا ڤێ دێ حکوومەتا ئاک-پارتی و مه‌هه‌پێ بدە. ئەگەر ترکیە بکارە ئێریشەکا نوو بکە، دێ ل دژی خەتا زاپ و ئاڤاشینێ بکە»، یا راست ئه‌ڤ گۆتن ئێعتیرافا راسته راست یا په‌كه‌كێ یه كو پێشوه‌خت دبێژه ب ئحتیماله‌كا پڕ مه‌زن خه‌تا زاپێ و ئاڤاشینێ دێ ب ده‌ردێ زنارا كێسته و كوره‌ژاری بچه!.
دوران کالکان ڤێ ئاخافتنێ د دەمەکێ دە دکە کو ترکیە ب بەردەوامی گەفا ئۆپەراسیۆنێ ل دژی رۆژئاڤایێ کوردستانێ دخوە، لێ ل گۆری ڤی بەرپرسێ په‌كه‌كێ، بەرێ ترکیێ ژ رۆژئاڤایێ کوردستانێ زێدەتر، ل باشوورێ کوردستانێ یە.
ئارتێشا ترکیێ ژ 18ێ نیسانا بۆری ڤە ل زاپێ دەست ب ئۆپەراسیۆنێ کریە و ب نێزیکبوونا زڤستانێ و کەشووهەوایا خرابا ناڤچەیێ رە ژی درێژی ددە ئۆپەراسیۆنا خوە.
رێخستنا په‌كه‌كێ ل سالا 2020ێ و ل گۆری پیلانه‌كه خوه یا قرێژ ب ده‌وله‌تا تركیێ ره، ب چار قوناغان هه‌رێمێن ستراته‌جیك یێن باشوورێ كوردستانێ ته‌سلیمی تركیێ كرن، خه‌تا زاپێ و ئاڤاشینێ ژی دێ قۆناغا پێنجه‌مین یا ڤێ پیلانێ به.
