فەرماندارێ گشتی یێ ھەسەدێ مەزلووم عەبدی رادگھینە، ئەگەر ئارتێشا ترکیێ ئێریشێ کۆبانی و منبجێ بکە، ئەڤ یەک ژ ھەسەدێ زێدەتر، دێ ژ بۆ ئارتێشا سووریێ ببە پرسگرێک، ژ بەر کو ھێزێن رێژیما سووریێ دو قاتان ژ ھێزێن ھەسەدێ زێدەتر ل ڤان ھەرێمانن.
فەرماندارێ گشتی یێ ھەسەدێ مەزلووم عەبدی د ھەڤپەیڤینەکا لگەل رۆژنامەیا “شەرق ئەل-ئەوسەت” دا کو ئیرۆ ھاتیە وەشاندن، ل سەر پێشنیارا رووسیا یا ڤەکشینا ھەسەدێ ژ کۆبانی و منبجێ راگھاند، “ژ خوە ھێزێن رەژیمێ ل کۆبانی، منبج و تل رەفعەتێ ھەنە و دو قاتان ژ ھێزێن مە زێدەترن.”
ھەر وھا گۆت: “نھا ئەگەر ئێریشەک ل سەر کۆبانی و منبجێ چێببە، ژ مە زێدەتر دێ ژ بۆ رەژیمێ ببە پرسگرێک. ھێزێن رەژیمێ ب چەک و تانکێن خوە ل سەر سینۆرن و ئەو دێ هێن ئارمانجکرن. وێ دەمێ دڤێت رەژیم بریارەکێ بدە، یان ئەو دێ ڤەکشە و وان دەڤەران ژ بۆ ئارتێشا ترک بھێلە، یان ژی دێ شەر بکە.”
عەبدی تەکەز کر ژی: “پێویستی ب ڤەکشینا ھێزێن مە و دەرباسبوونا ھێزێن رێژیمێ نینە، ژ بەر کو بەرێ ئەو ل ورن. ئەگەر ئەو بەحسا ڤەکشینا ھێزێن ئاسایشێ و سازیێن دنێن رێڤەبەریا خوەسەر دکن، ئەو خەلکێ دەڤەرێ نە و خوە ب خوە دپارێزن و ئەم ژی ڤەناکشن.”
فەرماندارێ گشتی یێ ھەسەدێ ئاماژە ب وێ یەکێ کر، ھێزێن وان پابەندی ھەموو رێکەفتنێن ھاتنە کرن بوونە، چ یێن لگەل رێژیما سووریێ دا و چ یێن د ناڤبەرا رووسیا و ترکیێ دا ھاتنە کرن و ھێزێن ھەسەدێ 30 کم دووری سینۆرێ ترکیێ نە.
د وێ دەربارێ دا عەبدی گۆت: “ژ ئالیێ خوە ڤە ئەم دێ پابەندی رێکەفتنێن سالا 2019ێ بن. ھەبوونا مە ل ور نینە ھەتا کو ژ مە بێ خوەستن ب کووراھیا 30 کم ڤەکشن. ئەم ب فەرمی نە ل سەر سینۆرن. ھێزێن ئەولەکاریا ھوندرین (ئاساییش) ھەنە، لێ ئەو ل دەرڤەیی رێکەفتنانن.”
فەرماندارێ گشتی یێ ھەسەدێ دەستنیشان کر ژی، رۆلەکا باشا فشارا ئامەریکا و ناڤدەولەتی ل سەر ترکیێ ھەبوو کو ئاستا ئێریشا ل سەر رۆژئاڤایێ کوردستانێ و باکورێ سووریێ د چەند رۆژێن داویێ دا کێم بوونە.
ئەڤ یەک د دەمەکێ دایە، رۆژنامەیا “واشنگتۆن پۆست” ژ زارێ بەرپرسێن رێڤەبەریا ئامەریکی راگھاند، پەنتاگۆن خوە ئامادە دکە کو ھەموو ئۆپەراسیۆنێن خوە یێن مەیدانی لگەل ھەسەدێ دا ل باکورێ سووریێ ژ نوو ڤە دەست پێ بکە و بەرفرەھتر بکە.
