ب ئێریشا سه‌ر زێلكان په‌كه‌كێ گۆمانا ته‌رۆرێ سه‌ر 600 خوه‌نده‌كارێن ئێزدی چێكریه
داوی ئێریشا سه‌ر باره‌گه‌ها «زێلكان» یا ئارتێشا تركیێ، په‌كه‌كێ ب ئالیكارییا حه‌شدا شه‌عبی كو ئه‌و ژی به‌شه‌كه ژێ، ژ بانێ یێك ژ خانیێن ل باشیكێ ئه‌نجام دا، ئه‌ڤ خانی په‌كه‌كێ ب ناڤێ خوه‌ندكارێن ئێزدی یێن ل زانینگه‌ها مووسلێ، ب كرێ گرتبوو.
باره‌گه‌ها زێلكان یا ئارتێشا تركیێ كو دكه‌ڤه ناڤچه‌یا باشیكێ یا ل سینۆرێ پارێزگه‌ها نه‌ینه‌وایێ، ل رۆژا 4/12/2022 راستی ئێریشه‌كه ب رۆكه‌تان هات، د دانێ شه‌ڤێ ده 6 رۆكه‌ت ب هاوردۆا وێ باره‌گه‌هێ كه‌تن كو ژ بانێ یێك ژ مالێن ل باشیكێ هاتبوون ئاڤێتن.
چاڤكانیێن تایبه‌ت یێن پێگه‌ها «داركا مازی» ل ده‌شتا نه‌ینه‌وایێ، ئاگاهیێن تایبه‌ت ده‌ربارێ ئێریشێ ب ده‌ست خستنه و ئه‌شكه‌ره كرن، شانه‌یێن په‌كه‌كێ یێن ل باشیكێ خانیێ كو ئێریش ژێ هاتییه ئه‌نجام دایین ب ناڤێ خوه‌ندكارێن ئێزدی یێن زانینگه‌ها مووسلێ ب كرێ گرتبوو و هنه‌ك كه‌س ب ناڤێ خوه‌ندكارێن ئێزدی تێ ده حه‌واندبوون.
چاڤكانیێن مه ده‌ستنیشان كرن، ئه‌ندامه‌كی فه‌وجا 80 یا حه‌شدا په‌كه‌كێ، ئه‌و كه‌س وه‌كه خوه‌ندكارێن ئێزدی یێن شه‌نگالێ ناساندن و پشتره ژ بۆی به‌رژه‌وه‌ندییا په‌كه‌كێ ئه‌ركدار كرن، وان ئێریش ب رییا «ئه‌پلیكه‌یشن» ئانگو به‌رنامه‌یه‌كی كۆنترۆلێ ئه‌نجام دا و رۆكه‌تهاڤێژ ل سه‌ر بانێ مالێ دانان و ئاراسته‌ی سه‌ربازگه‌ها زێلكانێ كرن و ره‌ڤیان.
ئاگاهیێن ده‌ستێ مه دیار كرنه كو پاش ئێریشێ و هه‌یا ئیرۆ سازیێن ئه‌وله‌كاریێ یێن ئیراقێ ل سه‌ر خوه‌نده‌كارێن ئێزدی یێن شه‌نگالێ ب گۆمان كه‌تنه و ده‌ما خوه‌نده‌كار هاتن و چووینێ ل نێڤبه‌را باشیكێ و شه‌نگالێ دكن، وان ژ پاسان دئینن ده‌رێ و پشكنینه‌كه توند ژ وان ره دكن، جارنا ژێ ره دبێژن ژ بۆ كو هوون ده‌رباس ببن پێویسته فۆرما ئه‌وله‌كاریێ بنڤیسینن و نڤیسا زانینگه‌هێ ژی ب وه ره به.
چاڤكانیێن پێگه‌ها مه ده‌ستنیشان كرنه كو ئه‌ڤ رێكار بوونه جیهێ نیگه‌رانییا خوه‌نده‌كارێن ئێزدی یێن ل زانینگه‌ها مووسلێ كو هه‌ژمارا وان بێهتری 600 كه‌سانه و پرانی ژێ خانی بۆ خوه ل باشیكێ ب كرێ گرتنه.
رێخستنا په‌كه‌كێ ب ڤی ئاوایی دژاتیا گه‌لێ ئێزدی، كورد و كوردستانێ دكه، ڤێ رێخستنێ وه‌كه چاوا شه‌ر و به‌رخوه‌دانا خوه یا ساخته ئانی یه شه‌نگالێ و هه‌رێما كوردستانێ، نها ئه‌و هه‌ول دده ب ڤان چالاكیێن خوه یێن خرش و به‌تال یێن ل سه‌ر سه‌ربازگه‌ها زێلكانێ، تركیێ ئیستیفزاز بكه و دبه سه‌ده‌م كو تركێن داگیركه‌ر شه‌نگالێ بۆردۆمان بكن، ژ ئالییه‌كی دن ڤه په‌كه‌كێ ب ڤێ ئێریشێ گه‌لێ ئێزدی یێ ئاشتیخواز كرنه جیهێ گۆمانێ و ته‌رۆریست و ره‌وش گهایه ئاسته‌كی ووسا كو ئێدی ئێزدیێن باشیكێ و یێن شه‌نگالێ ل به‌ر یێك كرنه ره‌شه و ژ هه‌ڤ د ترسن.
