مافناس: دەسهلات دخوازە پرسا کورد ب شەر چارەسەر بکە

مافناس: دەسهلات دخوازە پرسا کورد ب شەر چارەسەر بکە

ب ھاتنا 10ێ بەرفانبارێ رۆژا جیھانی یا مافێ مرۆڤان، ل ترکیێ ژ ئالیێ رێخستنێن مافێن مرۆڤان ڤە راپۆرتا سالا 2022یێ د وارێ بنپێکرنا مافان دە ھاتە راگھاندن. رایەدارێن کۆمەلە و وەخفێن مافێ مرۆڤان دیار دکن کو ل ترکیێ د ھەموو وارێن ژیانێ دە بنپێکرن ھەنە و ھەر زێدە مافێ ژیانێ ھاتیە بنپێکرن. تایبەتی ژی تونە ھەسباندنا گەلێ کورد وەک سالێن بەری ئیسال ژی بەردەوام کریە.

کۆمەلەیێن مافێ مرۆڤان راپۆرتا سالانەیا بنپێکرنێن ل ترکیا و باکورێ کوردستانێ د وارێ مافان دە روو دانە پارڤە کر. د راپۆرتا ھاتی راگھاندن دا د 11 مەھێن بۆری یێن سالا 2022یێ دە ھەری زێدە مافێ ژیانێ و مافێ ئازادیا فکر و رامانان ھاتیە بنپێکرن. ل گۆری راپۆرتێ د شەرێ ناڤبەرا پەکەکێ و ئارتێشا ترکیێ دە، د ئێریشێن نیژادپەرەستی یێن ل سەر کورد، پەنابەر و کێمنەتەوان دە، ژ بەر نەبوونا بەرگریان ل سەر کار و د ئێریشێن مێران یێن ل سەر ژن و زارۆکان دە ب گشتی 2 ھەزار و 200 کەسان جانێ خوە ژ دەست دایە. ل گەل ڤێ یەکێ ژ بەر کو نووچە ئامادە کرنە و فکرێن خوە راگھاندنە 64 رۆژنامەڤان نھا گرتی نە و دەربارێ 252 خەبەتکارێن چاپەمەنیێ دە دۆز ھاتیە ڤەکرن. مافناس دیار دکن نە تەنێ د ڤان ھەر دو مژاران دە بەلکو د ھەموو قادێن ژیانێ دە بنپێکرن د ئاستا ژۆر دەیە.

ھەڤسەرۆکێ کۆمەلەیا مافێ مرۆڤان ئۆزتوورک تورکدۆگان ژ بۆ کوردستان 24ێ گۆت: “د مژار عەدالاەت، ئازادیا فکر و رامان و بێسزاکرنێ دا ژی رەوش ل ترکیێ گەلەک خرابە. د وارێ مافێن ئابۆری و جڤاکی دا ژی بنپێکرن د ئاستا ھەری ژۆر دا نە و گەلێ ترکیێ لگەل قەیرانەکا کوور یا ئابۆری روو ب روو یە.  ل گۆری راپۆرتێن ناڤدەولەتی ژی ترکیا د رێزا وەلاتێن نەئازاد دایە و ھەری زێدە دۆسیەیێن ترکیێ ل بەر دەستێ دادگەھا مافێ مرۆڤان یا ئەورۆپایێ نە.”

ھەر وھا د راپۆرتێ دا تێ گۆتن کو دەستهلاتا ترکیێ ئەڤە 7 سالن پرسا کورد ب شەری دخوازە چارەسەر بکە و د ئەنجامێ دا ھەتا نھا 6 ھەزار کەسان جانێ خوە ژ دەست دایە و دیسا کورد تونە تێن حەسبانن.

مافناس حوسەیین باشبالابان دبێژە: “2022یێ دا تشتەکی وەک گاڤەکا ئاشتیێ گاڤەکا سیاسی نە دیارە. ل سەر چاپەمەنیێ، ل سەر سیاسەتمنەدارێن کورد، ل سەر سازی، ناسنامە و زمانێ کوردان دیسا قەدەغەکرن بەردەوام کر.”

ل گەل ڤێ یەکێ د راپۆرتێ دا تێ گۆتن کو ل گرتیگەھێن سەرانسەرێ ترکیا و باکورێ کوردساتنێ نھا نێزی 340 ھەزار گرتی ھەنە کو ژ وان 1500 زێدەتر گرتیێن نەخوەشن و د 11 مەھێن بۆری دا 61 کەسان د گرتیگەھان دا جانێ خوە ژ دەست دانە.

پوستێن ھەمان بەش