ئەردۆگان دەربارێ “ھەسەدێ” دا داخوازەک ژ پوتین کر

سەرۆککۆمارێ ترکیێ رەجەب تەییب ئەردۆگان د پێوەندیەکا تەلەفۆنی دا لگەل سەرۆکێ رووسیایێ ڤلادمیر پوتین تەکەزی ل سەر ڤەکشینا ھێزێن ھەسەدێ 30 کیلۆمەتران ژ سینۆرێ ترکیێ و جێبەجێکرنا رێکەفتنا سۆچیێ کر.

ل گۆری داخویانیا سەرۆککۆماریا ترکیا، ئەردۆگان د پێوەندیا تەلەفۆنی دا داخوازا جێبەجێکرنا پەیمانا سۆچی یا سالا 2019ێ ژ پوتین کر و ئاماژە ب وێ یەکێ کر کو دوورخستنا ھێزێن ھەسەدێ 30 کیلۆمەتران ژ سینۆرێن ترکیا، ئێک ژ خالێن وێ یە.

رۆژا 22یێ جۆتمەھا 2019ێ سەرۆکێ رووسیا ڤلادمیر پوتین و سەرۆککۆمارێ ترکیێ رەجەب تەییب ئەردۆگان ل باژارێ سۆچی تێگھیشتنەک ئیمزە کربوو، ل گۆر وێ رێکەفتنێ ژی دڤێت ھێزێن ھەسەدێ/یەپەگێ 30 ک.م ژ سینۆر ڤەکشن.

ھەر دەربارێ ڤێ پرسێ دە، فەرماندارێ گشتی یێ ھەسەدێ مەزلووم عەبدی ھەفتەیا بۆری د ھەڤپەیڤینەکا لگەل رۆژنامەیا “شەرق ئەل-ئەوسەت” دا گۆت: “ژ ئالیێ خوە ڤە ئەم پابەندی رێکەفتنێن سالا 2019ێ بوونە. ھەبوونا مە ل ور نینە ھەتا کو ژ مە بێ خوەستن ب کووراھیا 30 کم ڤەکشین. ئەم ب فەرمی نە ل سەر سینۆرن. ھێزێن ئەولەکاریا ھوندرین (ئاساییش) ھەنە، لێ ئەو ل دەرڤەیی رێکەفتنانن.”

د پێوەندیا تەلەفۆنی یا ئەردۆگان یا لگەل سەرۆکێ رووسیایێ، مژارێن ھەرێمی یێن وەکی ئەنەرژی، پێوەندیێن ترکیا و رووسیایێ، کۆریدۆرا گەنم و تێکۆشینا ل دژی تەرۆرێ ھاتن نرخاندن.

د داخویانیێ دا وھا ھات گۆتن: “سەرۆککۆمار ئەردۆگان ژ دل خواستیە کو شەرێ د ناڤبەرا رووسیا و ئوکراینایێ دا د زووترین دەم دا ب داوی ببە.”