یەک ژ ناڤەندێن دانووستانا دیاربەکرێ، سووکا شەوتی ژ بەر قەیرانا ئابۆریێ د رەوشەک خراب دەیە. گەلەک دکاندارێن سووکا شەوتی دبێژن ژ بەر بھابوونا کرێیێن دکانان، ئەو ھاتنە وێ ئاستێ کو دکانێن خوە بگرن.
ل سووکا شەوتی یا کو یەک ژ سەمبۆلێن دیاربەکرێ یە، 430 دکاندار ھەنە و ئەڤ سووکا دیرۆکی ب سالانە یەک ژ ناڤەندێن دانووستانێ یە. دکاندارێن سووکا دیرۆکی نھا د رەوشەکا خراب دا نە، ژ بەر کو قەیرانا ئابۆریێ باندۆرەک نەریینی ل وان دکە. دکاندار دبێژن پێشیێ شەرێ خەندەقان، پاشێ پێڤاژۆیا ڤایرۆسێ کۆرۆنا و نھا ژی قەیرانا ئابۆریێ. ئەڤ ھەر سێ رەوش کەتن سەر ھەڤ و وەقفا کو بەرپرسێ دکانانە، ئامادەکاریێ دکە کو ژ سالا نوو پێ دا بھایێ کرێیان %100 زێدەتر بھا بکە کو دکاندار بالێ دکێشن ئەو نکارن ژ بن ڤێ رەوشێ دەربکەڤن.
دکاندار جەمیل ئەرجان ژ بۆ کوردستان 24ێ دیار کر: “ژ سالا 1986ێ ڤە ل ڤێ دەرێ دکاندارم. بەرێ ب کارەکێ تەنێ د رۆژەکێ دا من دکاری ئەز کرێیا خوە ب دەست بخم لێ نھا مەھەکێ ئەز کار دکم 3 ھەزار لیرە دکەڤە دەستێ من و کرێیا من 2 ھەزار لیرەیە. تێرا دەبارا من ناکە.”
د دەمێن داوی دا ئێدی دکاندار ھاتنە وێ ئاستێ کو دکانێن خوە بگرن و ھەتا چەند دکاندارێن سووکا شەوتی ژ نەچاری دکانێن خوە گرتنە ژی. دکاندار تینن زمان کو دڤێت رەوشا وان بەرچاڤ بهێتە گرتن دا کو بکاربن کارێ خوە بدۆمینن.
دکاندار فەرھاد کورت دبێژە: “رەوش وسا بەردەوام بت ئەم ژی دێ هێین وێ ئاستێ کو دکانێن خوە بگرن. دبێژن دێ وەقف کرێیان بلند بکە. وەقف د دەستێ دەولەتێ دایە، دڤێت دەولەت رەوشا مە ببینە.”
دکاندارێن سووکا شەوتی ددن زانین بەرێ کەسێن نەدکارین ژ ناڤەندێن مەزنێن دانووستانێ پێدڤیێن خوە بستینن بەرێ خوە ددان سووکا شەوتی لێ نھا ل سووکا شەوتی ژی ژ نەچاریێ بھابوون چێبوویە.
