شەرمە، گونەھە، حەیفە!

گەلەک جارا مرۆڤ بەحسا ھەلوەستا نژادپەرەستی ل ھمبەر زمانێ کوردی دکە. د ناڤا ترکان دە ئەڤ ھەلوەست وەک دەستوورەکی نەنڤیساندیە و گەلەک کەس ئۆتۆماتیک ھەستێن خوە یێن نژادپەرەستی ل ھمبەر بکارئاننا زمانێ کوردی ددن نیشاندان. زمانێ کوردی د کانالا دەولەتێ یا TRT کوردی دە تێ بکارئانین و ئەڤ کانال ب کوردی وەشانێ دکە و کورمانجی، سۆرانی و زازاکی بەرنامەیا چێدکە. لێ بەرتەکا کەسێن وەک «ئەسرا ئەرۆل» و ھندەکێن دن ژ کەسایەتیا وان یا نژادپەرەستی دهێت.

د بەرنامەیاکا ATV دا کو ژ ئالیێ ئەسرا ئەرۆل ڤە دهێت رێڤەبرن ئەڤ بوویەر روودا.

دەما ژنەکا کو پشتی دەمەکی درێژ د بەرنامەیا ئەسرا ئەرۆل دا کەچا خوە دیت، ب زمانێ کوردی ھەستێن خوە ئانین زمان، دەما ب کوردی ئاخڤتی د جھ دا ATV وەشان قوت کر..

ژنا ب ناڤێ بەسیمە یا کو دەمەکی درێژ ژ دیتنا کەچا خوە بێبار بووبوو، نەکاری ھێسترێن خوە بگرە. دەما کو کەچا خوە ھەمبێز کر و دگریا، ب کوردی ھەستێن خوە ئانین زمان، ATV دەنگێ وەشانێ بری.

دەما بەسیمە د گەل کەچا خوە دا ب کوردی دئاخڤی، کەچا وێ «گولایێ» گۆت، “دایکا من زێدە ب ترکی نزانە.” کەچا وێ گۆتنا وێ ب کوردی وەرگەراندیە: “کەزەبا من دشەوتە”.

پشتی دەمەک درێژ وەشان قوت بوو، بەرپرسا بەرنامەیێ ئەسرا ئەرۆل گۆت، “خالەتا بەسیمە، ئەز دزانم کو تو ژ بۆ کەچا خوە خەمگین دبی، لێ ئەز ژی دخوازم فێم بکم کا تو چ دبێژی.” پشتی ھشیاریا ئەرۆل دایکا بەسیمەیێ دەست ب ئاخافتنا ترکی کر.

گەلەک کەسان د مەدیا جڤاکی دا بەرتەک نیشاندان و ئەڤ ھەلوەستا ATV شەرمەزار کرن و ئەڤ سانسوورا ATV  یا ل سەر زمانێ کوردی ب شەرمەک مەزن ب ناڤ کرن و ATV رەخنە کرن.

سەرۆکێ گشتی یێ پارتیا دەڤا عەلی باباجان ژی ل ھمبەر ڤێ ھەلوەستا ATV بەرتەک نیشاندا و ل سەر حەسابا خوە یا تویتتەرێ ئەڤ یەک شەرمەزر کر.

باباجان گۆت: “ئەڤ نێرینا کو مرۆڤان رەنجیدە دکە، شەرمە، گونەھە، حەیفە.”