ئەنەکەسێ دا خوویاکرن کو، ئەندامەکی وان ژ ئالیێ گرووپەکێ چەکدارێن پەیەدێ ڤە ھاتیە رەڤاندن و داخوازا بەردانا وی دکە.
سەکرەتەریا گشتی یا ئەنەکەسێ د داخویانیەکێ دا راگھاند، “گرووپەکێ چەکدار یێ سەر ب پەیەدێ ڤە رۆژا 12/12/2022یێ ئەندامێ خوەجھیا تربەسپیێ یا ئەنەکەسێ و نوونەرێ تەڤگەرا جوانێن کورد عەدنان ئیسمایل رەمۆ ژ ناڤا زەڤیا وی رەڤاند.”
ل گۆری داخویانیا ئەنەکەسێ، وێ گرووپێ ب سەر مالا عەدنان ئیسمایل رەمۆ دا ژی گرت و پشکنین کر و ھەتا نھا چارەنڤیسا وی نە دیارە.
ئەنەکەسە دبێژە، ئەڤ شێوازێن رەڤاندنێ و کریارێن ترساندنێ، بەرووڤاژی پرەنسیبێن مافێن مرۆڤانە و شەرت و مەرجێن ژیانێ یێن دژوار، ئالۆزتر دکە.
ئەنەکەسە رەڤاندنا ئەندامێ ئەنجوومەنا خوەجھی یا تربەسپیێ شەرمەزار دکە و داخوازا ئەشکەرەکرنا چارەنڤیسا وی، بەردانا وی، راوەستاندنا ڤان کریاران و بنپێکرنێن ل دژی ئەندامێن خوە و ھەموو وەلاتیان دکە.
ئەڤ نە جارا یەکەمە کو ئەندام و ئالیگرێن ئەنەکەسێ و پارتیێن ب سەر وێ ڤە ژ ئالیێ ئاسایش و ھێزێن سەر ب رێڤەبەریا خوەسەر ڤە تێنە رەڤاندن، پێشتر گەلەک جاران ئەندام و ئالیگرێ وێ ھاتنە رەڤاندن و ئۆفیس و نڤێسینگەهێن وێ ھاتنە شەوتاندن.
بەرپرسێن ئەنەکەسێ دبێژن، پەیەدە ب سیاسەتا خوە، رۆژئاڤایێ کوردستانێ بەر ب مەترسیێن مەزن دبە و بوونە سەدەما وێرانی، کۆچبەرکرن، تێکچوونا رەوشا ئەولەھی و ئابۆریێ.
