پارتیا دۆزا ئازاد (ھودا پار) سەردانا پارتیا دەمۆکراتا کوردستانێ–ترکیا (پەدەکە-ت) کر و د سەردانێ دا سەرۆکێن ھەردو پارتیان بانگ کرن کو دڤێت دەملدەست ب ئاوایەکی دادوەرانە پرسا کورد بهێت چارەسەرکرن.
ل دیاربەکرێ شاندەیەکا پارتیا دۆزا ئازاد (ھودا پار) سەردانا پارتیا دەمۆکراتا کوردستانێ-ترکیا کر. سەرۆکێ گشتی یێ ھودا پارێ زەکەریا یاپجۆغلوو پێشەنگیا شاندەیێ کر و ژ ئالیێ سەرۆکێ گشتی یێ پەدەکە-ت محەمەد ئەمین کارداش ڤە ھات پێشوازیکرن.
د سەردانێ دا ھەردو ئالیان ئاماژە کرن کو مافێن گەلێ کورد تێن بنپێکرن و دڤێت ب رێکا یاسایی ب دادپەروەری پرسا کورد بهێت چارەسەرکرن.
سەرۆکێ گشتی یێ ھودا پارێ زەکەریا یاپجۆغلوو ئاماژە کر کو ژ بۆ چارەسەریا پرسگرێکان بەردەوامیا دیالۆگێ گرینگە.
سەرۆکێ گشتی یێ پەدەکە-ت محەمەد ئەمین کارداش ژی ئانی زمان کو وان ل ھەڤ کریە کو پرسا کورد ھەیە و دڤێت ژ بۆ چارەسەریا پرسا کورد ب ھەڤرا خەباتێ بمەشینن.
دەربارێ هەڤپەیمانی و ھلبژارتنان دا ژی زەکەریا یاپجۆغلوو دا زانین ھەتا نھا ھودا پارێ د ناڤا چ هەڤپەمانیان دا جھ نەگرتیە و نەھاتیە ڤەخواندن، لێ ئەڤە نایێ وێ واتەیێ کو د هەڤپەیمانیەکێ دا جھ نەگرن و ئامادە نە ژ بۆ ڤێ یەکێ د چارچۆڤەیا پاراستنا مافێن کوردان دا ھەڤدیتنێ بکن و ئەگەر ھودا پار د ناڤا هەڤپەیمانیەکێ دا جھ نەگریت ژی رێخستنبوونا وان تێرێ دکە کو ب تەنا سەرێ خوە ژی وەک پارتی بەشداری ھلبژارتنان ببن.
